പത്തനംതിട്ട: സംസ്ഥാനത്ത് കനത്ത മഴയും മിന്നൽ പ്രളയവും വിതച്ച നാശനഷ്ടങ്ങൾ നേരിട്ട് വിലയിരുത്താൻ മുഖ്യമന്ത്രി വി. ഡി. സതീശൻ ഇന്ന് പത്തനംതിട്ട ജില്ലയിലെ പ്രളയബാധിത മേഖലകളിൽ സന്ദർശനം നടത്തും. ഉച്ചയ്ക്ക് 12 മണിയോടെ ആദ്യ കേന്ദ്രമായ ആറന്മുളയിൽ എത്തുന്ന അദ്ദേഹം തുടർന്ന് റാന്നി ഉൾപ്പെടെയുള്ള മറ്റ് ദുരന്തബാധിത പ്രദേശങ്ങളും സന്ദർശിക്കും.
പത്തനംതിട്ട ജില്ലയിലെ മലയോര-ഇടനാട് മേഖലകളിൽ ഉണ്ടായ മിന്നൽ പ്രളയത്തിൽ വ്യാപക നാശനഷ്ടമാണ് റിപ്പോർട്ട് ചെയ്തിരിക്കുന്നത്. വിവിധ ദുരിതാശ്വാസ ക്യാമ്പുകളിൽ കഴിയുന്ന ജനങ്ങളെ നേരിൽ കണ്ട് സംസാരിക്കുന്ന മുഖ്യമന്ത്രി, ദുരിതാശ്വാസ പ്രവർത്തനങ്ങളും പുനരധിവാസ നടപടികളും നേരിട്ട് വിലയിരുത്തും. വെള്ളക്കെട്ടും മറ്റ് അടിയന്തര പ്രശ്നങ്ങളും പരിഹരിക്കുന്നതിനായി ജില്ലാ കളക്ടർ ഉൾപ്പെടെയുള്ള ഉന്നത ഉദ്യോഗസ്ഥരുമായി അദ്ദേഹം അവിടെവച്ച് അവലോകന യോഗം നടത്തും.
തമിഴ്നാടിന് മുകളിലുള്ള ചക്രവാതച്ചുഴിയുടെ സ്വാധീനം മൂലം സംസ്ഥാനത്ത് വരും ദിവസങ്ങളിലും കനത്ത മഴ തുടരുമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. 12 ജില്ലകളിൽ ഓറഞ്ച് അലർട്ട് പ്രഖ്യാപിച്ചിരിക്കുന്ന സാഹചര്യത്തിൽ നദീതീരങ്ങളിൽ ഉള്ളവരും താഴ്ന്ന പ്രദേശവാസികളും ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
