ന്യൂഡൽഹി: ആഗോള ഐടി സേവന ഭീമനായ അക്സെഞ്ചർ (Accenture) തങ്ങളുടെ ജീവനക്കാരുടെ ശമ്പള വർദ്ധനവ് നയത്തിൽ നിർണായക മാറ്റങ്ങൾ വരുത്തി. ജൂൺ മാസത്തെ സാലറി ഹൈക്ക് സൈക്കിളിൽ കൂടുതൽ ജീവനക്കാർക്ക് സാമ്പത്തിക ആനുകൂല്യം ലഭ്യമാക്കുന്നതിനായാണ് പുതിയ രീതി അവതരിപ്പിച്ചിരിക്കുന്നത്. ഇതനുസരിച്ച് ജീവനക്കാർക്ക് ലഭിക്കുന്ന ആകെ വർദ്ധനവ് തുക അടിസ്ഥാന ശമ്പളവും (Base Pay) ഒറ്റത്തവണ പണമായും (Lump-Sum Payment) വീതിച്ചു നൽകും.
കഴിഞ്ഞ വർഷത്തെ നിയന്ത്രിത ശമ്പള വർദ്ധനവിന് ശേഷമാണ് കൂടുതൽ ജീവനക്കാരിലേക്ക് ആനുകൂല്യങ്ങൾ എത്തിക്കാൻ കമ്പനി പുതിയ തീരുമാനം കൈക്കൊണ്ടത്.
50:50 തത്വത്തിലുള്ള വിഭജനം: ടീം ലീഡർമാർ തീരുമാനിക്കുന്ന ആകെ വർദ്ധനവ് തുക പകുതി വീതം വിഭജിക്കും. ഉദാഹരണത്തിന്, ഒരു ജീവനക്കാരന് 3% ശമ്പള വർദ്ധനവ് ലഭിക്കുകയാണെങ്കിൽ, അതിൽ 1.5% അടിസ്ഥാന ശമ്പള വർദ്ധനവായും (Base Pay) ബാക്കി 1.5% ഒറ്റത്തവണ ലമ്പ്‌സം തുകയായും അക്കൗണ്ടിലെത്തും.
കൂടുതൽ പേർക്ക് ആനുകൂല്യം: ഒറ്റത്തവണ പേയ്‌മെന്റ് ഉൾപ്പെടുത്തിയത് വഴി കമ്പനിക്ക് ദീർഘകാല സ്ഥിരച്ചെലവുകൾ (Payroll Burden) വർദ്ധിപ്പിക്കാതെ തന്നെ കൂടുതൽ ജീവനക്കാരിലേക്ക് ആനുകൂല്യങ്ങൾ വ്യാപിപ്പിക്കാൻ സാധിക്കും.
പ്രൊമോഷൻ ലഭിക്കുന്നവർക്ക് ബാധകമല്ല: സ്ഥാനക്കയറ്റം (Promotion) ലഭിക്കുന്ന ജീവനക്കാർക്ക് ഈ 50:50 വിഭജനം ബാധകമല്ല. അവരുടെ ശമ്പള വർദ്ധനവ് പൂർണ്ണമായും അടിസ്ഥാന ശമ്പളമായിത്തന്നെ ലഭിക്കും.
ഡിസംബർ ബോണസിനെ ബാധിക്കില്ല: ജൂണിലെ ഈ ലമ്പ്‌സം പേയ്‌മെന്റ് ഡിസംബർ മാസത്തിൽ സാധാരണയായി നൽകുന്ന റഗുലർ ബോണസിനെ ബാധിക്കില്ല. കൂടാതെ, അടിസ്ഥാന ശമ്പള വർദ്ധനവും ലമ്പ്‌സം തുകയും ജീവനക്കാരുടെ ആകെ വരുമാനത്തിൽ ഉൾപ്പെടുത്തി FY26 ബോണസ് നിർണ്ണയത്തിന് കണക്കാക്കുകയും ചെയ്യും.
ഓഹരി പദ്ധതികളിലെ പിടിത്തം: വോളന്ററി ഇക്വിറ്റി ഇൻവെസ്റ്റ്‌മെന്റ് പ്രോഗ്രാം (VEIP), എംപ്ലോയി ഷെയർ പർച്ചേസ് പ്ലാൻ (ESPP) എന്നിവയിൽ അംഗങ്ങളായവരുടെ ലമ്പ്‌സം തുകയിൽ നിന്നും നിശ്ചിത ശതമാനം തുക മാറ്റിവെക്കും.
മാറ്റത്തിന് പിന്നിലെ കാരണം
ആഗോള സാമ്പത്തിക വെല്ലുവിളികൾ നിലനിൽക്കുന്ന സാഹചര്യത്തിൽ കമ്പനിയുടെ ഫിക്സഡ് ചെലവുകൾ അമിതമായി വർദ്ധിപ്പിക്കാതെ തന്നെ, ജീവനക്കാർക്ക് ഉടനടി സാമ്പത്തിക നേട്ടം നൽകാൻ ഈ ഹൈബ്രിഡ് മോഡൽ സഹായിക്കുമെന്ന് വിലയിരുത്തപ്പെടുന്നു.
