ഹൂസ്റ്റൺ, ടെക്സസ് — അവസാന നിമിഷം വരെ നെഞ്ചിടിപ്പേറിയ പോരാട്ടത്തിനൊടുവിൽ ജപ്പാനെ ഒന്നിനെതിരെ രണ്ട് ഗോളുകൾക്ക് തകർത്ത് ബ്രസീൽ 2026 ഫിഫ ലോകകപ്പിന്റെ പ്രീ-ക്വാർട്ടറിലേക്ക് യോഗ്യത നേടി. നിശ്ചിത സമയവും കടന്ന് ഇഞ്ചുറി ടൈമിന്റെ ആറാം മിനിറ്റിൽ (90+6′) സബ്സ്റ്റിറ്റ്യൂട്ടായി ഇറങ്ങിയ ഗബ്രിയേൽ മാർട്ടിനെല്ലി നേടിയ തകർപ്പൻ ഗോളാണ് അഞ്ച് തവണത്തെ ലോക ചാമ്പ്യന്മാരായ കാനറികൾക്ക് നാടകീയ വിജയം സമ്മാനിച്ചത്.
മത്സരത്തിന്റെ ഒന്നാം പകുതിയിൽ ജപ്പാനാണ് ബ്രസീലിനെ ഞെട്ടിച്ചുകൊണ്ട് ആദ്യ ഗോൾ നേടിയത്. 29-ാം മിനിറ്റിൽ ബ്രസീൽ മധ്യനിരയുടെ പിഴവിൽ നിന്ന് പന്ത് പിടിച്ചെടുത്ത കൈഷു സാനോ ലോങ് റേഞ്ചറിലൂടെ പന്ത് വലയിലെത്തിക്കുകയായിരുന്നു. ഒരു ഗോളിന് പിന്നിലായ ശേഷമാണ് രണ്ടാം പകുതിയിൽ ബ്രസീൽ ആക്രമണം ശക്തമാക്കിയത്.
56-ാം മിനിറ്റിൽ ഗബ്രിയേൽ മഗൽഹീസിന്റെ അസിസ്റ്റിൽ നിന്ന് മികച്ചൊരു ഹെഡറിലൂടെ വെറ്ററൻ താരം കാസെമിറോ ബ്രസീലിന് സമനില നേടിക്കൊടുത്തു. ജപ്പാൻ ഗോൾകീപ്പർ സിയോൺ സുസുക്കി വിനീഷ്യസ് ജൂനിയറിന്റെ ശ്രമങ്ങളടക്കം തടഞ്ഞ് മികച്ച പ്രകടനം കാഴ്ച്ചവെച്ചെങ്കിലും ഇഞ്ചുറി ടൈമിലെ മാർട്ടിനെല്ലിയുടെ ഗോൾ തടയാനായില്ല. പ്രീ-ക്വാർട്ടറിൽ ഐവറി കോസ്റ്റ് – നോർവേ മത്സരത്തിലെ വിജയികളെയാണ് ബ്രസീൽ നേരിടുക.
