പറവൂർ: കേരളത്തിന്റെ പുതിയ മുഖ്യമന്ത്രിയായി ചുമതലയേറ്റ ശേഷം ആദ്യമായി സ്വന്തം മണ്ഡലത്തിലെത്തുന്ന വി.ഡി. സതീശന് വിപുലമായ പൗരസ്വീകരണം ഒരുക്കാൻ പറവൂർ.ഇന്ന് നടക്കുന്ന പ്രൗഢഗംഭീരമായ സ്വീകരണ സമ്മേളനത്തിൽ മലയാളത്തിന്റെ മഹാനടൻ മോഹൻലാൽ മുഖ്യാതിഥിയായി പങ്കെടുക്കും. പ്രശസ്ത ഗാനരചയിതാവും സംവിധായകനുമായ ശ്രീകുമാരൻ തമ്പി സമ്മേളനം ഔദ്യോഗികമായി ഉദ്ഘാടനം ചെയ്യും.
മുഖ്യമന്ത്രിയായ ശേഷം ആദ്യമായി മണ്ഡലത്തിലെത്തുന്ന തങ്ങളുടെ പ്രിയ നേതാവിനെ വരവേൽക്കാനുള്ള ആവേശത്തിലാണ് പറവൂരിലെ ജനങ്ങൾ. പറവൂർ പൗരാവലിയുടെ ആഭിമുഖ്യത്തിൽ വൈകിട്ട് 5 മണിക്ക് സമൂഹ ഹൈസ്കൂൾ മൈതാനിയിലാണ് ഈ വൻ ജനകീയ സംഗമം സംഘടിപ്പിച്ചിരിക്കുന്നത്. പറവൂർ ജനതയുടെ വകയായുള്ള ആദ്യ സ്വീകരണം ചടങ്ങിൽ വെച്ച് മുഖ്യമന്ത്രിക്ക് സമർപ്പിക്കും.
