തിരുവനന്തപുരം: സംസ്ഥാനത്തെ സർക്കാർ ജീവനക്കാരെയും അധ്യാപകരെയും ഒരുപോലെ ബാധിക്കുന്ന സുപ്രധാന തീരുമാനത്തിലേക്ക് സർക്കാർ നീങ്ങുന്നു. സർക്കാർ ഓഫീസുകളുടെ പ്രവൃത്തിദിനം ആഴ്ചയിൽ അഞ്ചായി (Monday to Friday) നിജപ്പെടുത്തുന്നത് സംബന്ധിച്ച ചർച്ചകൾ സർക്കാർ പുനരാരംഭിച്ചു. വരാനിരിക്കുന്ന നിയമസഭാ തിരഞ്ഞെടുപ്പിന്റെ പെരുമാറ്റച്ചട്ടം നിലവിൽ വരുന്നതിന് മുൻപ് തന്നെ ഇതുസംബന്ധിച്ച പ്രഖ്യാപനം ഉണ്ടാകും.
ഫെബ്രുവരി 6-ന് നിർണായക യോഗം
വിഷയത്തിൽ അന്തിമ തീരുമാനമെടുക്കുന്നതിനായി ഫെബ്രുവരി 6-ന് ചീഫ് സെക്രട്ടറിയുടെ അധ്യക്ഷതയിൽ വിവിധ സർവീസ് സംഘടനകളുടെ ഓൺലൈൻ യോഗം വിളിച്ചുചേർത്തിട്ടുണ്ട്. പ്രവൃത്തിദിനങ്ങൾ കുറയ്ക്കുമ്പോൾ നിലവിലെ ജോലി സമയത്തിൽ വരുത്തേണ്ട മാറ്റങ്ങൾ, പൊതുജന സേവനങ്ങളെ ബാധിക്കാത്ത രീതിയിലുള്ള ക്രമീകരണങ്ങൾ എന്നിവ യോഗത്തിൽ ചർച്ചയാകും.
പ്രതിഷേധം തണുപ്പിക്കാൻ സർക്കാർ തന്ത്രം
നിലവിൽ ശമ്പള പരിഷ്കരണം ഉൾപ്പെടെയുള്ള ആനുകൂല്യങ്ങൾ വൈകുന്നതിൽ ജീവനക്കാർക്കിടയിൽ കടുത്ത അമർഷമുണ്ട്.
- ഡി.എ കുടിശിക: കുടിശികകൾ കുത്തനെ ഉയർന്നത് ജീവനക്കാരെ സർക്കാരിനെതിരെ തിരിക്കാൻ കാരണമായിട്ടുണ്ട്.
- ശമ്പള പരിഷ്കരണം: ഈ സർക്കാരിന്റെ കാലയളവിൽ ശമ്പള പരിഷ്കരണം നടപ്പിലാക്കാത്തതിൽ വലിയ പ്രതിഷേധമാണ് സംഘടനകൾ ഉയർത്തുന്നത്.
ഈ സാഹചര്യത്തിൽ, ആഴ്ചയിൽ അഞ്ച് പ്രവൃത്തിദിനം എന്ന ദീർഘകാലത്തെ ആവശ്യം അംഗീകരിക്കുന്നതിലൂടെ ജീവനക്കാരുടെ പ്രതിഷേധം തണുപ്പിക്കാമെന്നാണ് ചീഫ് സെക്രട്ടറി സർക്കാരിന് നൽകിയിട്ടുള്ള ഉപദേശം. കേന്ദ്ര സർക്കാർ ഓഫീസുകളിലെ മാതൃക സംസ്ഥാനത്തും നടപ്പിലാക്കാനാണ് ആലോചന.
ജോലി സമയത്തിൽ മാറ്റം വന്നേക്കാം
പ്രവൃത്തിദിനം അഞ്ചായി ചുരുക്കുമ്പോൾ ആഴ്ചയിലെ ആകെ ജോലി സമയം കുറയാതിരിക്കാൻ പ്രതിദിന പ്രവൃത്തിസമയം രാവിലെ 9 മുതൽ വൈകിട്ട് 5:30 വരെയോ 6 വരെയോ ആക്കി വർദ്ധിപ്പിക്കാൻ സാധ്യതയുണ്ട്.
