ന്യൂ ജേഴ്സി: 2026 ഫിഫ ലോകകപ്പിന്റെ പ്രീ-ക്വാർട്ടർ (റൗണ്ട് ഓഫ് 16) പോരാട്ടത്തിൽ ഇന്ന് ബ്രസീൽ നോർവെയെ നേരിടാൻ ഒരുങ്ങുമ്പോൾ ആരാധകർ ഉറ്റുനോക്കുന്നത് ഒരേയൊരു കാര്യത്തിലേക്കാണ്—സൂപ്പർ താരം നെയ്മർ ജൂനിയർ ഇന്ന് കളത്തിലിറങ്ങി ഗോൾ നേടുമോ?
വലത് കാൽമുട്ടിനേറ്റ പരിക്ക് മൂലം ടൂർണമെന്റിലെ ആദ്യ മത്സരങ്ങളിൽ ഭൂരിഭാഗവും ബെഞ്ചിലിരിക്കേണ്ടി വന്ന നെയ്മർ, ഇപ്പോൾ പൂർണ്ണ ഫിറ്റ്നസ് വീണ്ടെടുത്തതായാണ് റിപ്പോർട്ടുകൾ. പ്രീ-മാച്ച് പ്രസ് കോൺഫറൻസിൽ ബ്രസീലിയൻ പരിശീലകൻ കാർലോ അൻസലോട്ടി നെയ്മറുടെ ഫിറ്റ്നസിനെക്കുറിച്ച് വലിയൊരു സൂചന നൽകിയിട്ടുണ്ട്.
നെയ്മർ പൂർണ്ണ ആരോഗ്യവാനാണെന്നും 90 മിനിറ്റും കളിക്കാൻ സജ്ജനാണെന്നും അൻസലോട്ടി വ്യക്തമാക്കി.
”ഏറ്റവും പ്രധാനപ്പെട്ട കാര്യം നെയ്മർ കളിക്കാൻ ലഭ്യമാണ് എന്നതാണ്. ടീമിന് അദ്ദേഹത്തിന്റെ സേവനം ആവശ്യമാണെന്ന് തോന്നുമ്പോൾ ഞാൻ അദ്ദേഹത്തെ കളത്തിലിറക്കും. അതെ, 90 മിനിറ്റ് പൂർണ്ണമായി കളിക്കാൻ അദ്ദേഹം തയ്യാറാണ്.” – കാർലോ അൻസലോട്ടി.വിനീഷ്യസ് ജൂനിയറും നെയ്മറും ഒരുമിച്ച് ബ്രസീലിന്റെ ആക്രമണ നിരയിൽ അണിനിരക്കുമെന്നും കോച്ച് കൂട്ടിച്ചേർത്തു.
ഗ്രൂപ്പ് ഘട്ടത്തിൽ സ്കോട്ട്ലൻഡിനെതിരെ കേവലം 15 മിനിറ്റ് മാത്രമാണ് നെയ്മർക്ക് കളിക്കാൻ കഴിഞ്ഞത്. ജപ്പാനെതിരെയുള്ള കഴിഞ്ഞ മത്സരത്തിൽ താരം കളിച്ചതുമില്ല.
എർലിങ് ഹാലണ്ടിന്റെ കരുത്തിൽ വരുന്ന നോർവെയെ മെറ്റ്‌ലൈഫ് സ്റ്റേഡിയത്തിൽ നേരിടുമ്പോൾ ബ്രസീലിന് നെയ്മറുടെ സാന്നിധ്യം വലിയ ഊർജ്ജം നൽകും.
നോർവെയുടെ പ്രതിരോധ കോട്ട തകർത്ത് നെയ്മർ തന്റെ ഈ ലോകകപ്പിലെ ആദ്യ ഗോൾ കണ്ടെത്തുമെന്ന പ്രതീക്ഷയിലാണ് ലോകമെമ്പാടുമുള്ള കാനറി ആരാധകർ.
