ആലപ്പുഴ: രാഷ്ട്രീയ കേരളം ഉറ്റുനോക്കുന്ന പോരാട്ടത്തിന് ആലപ്പുഴ വേദിയാകുന്നു. നവകേരള സദസിനിടെ മുഖ്യമന്ത്രിയുടെ ബസിന് നേരെ കരിങ്കൊടി കാട്ടിയതിന് ഗൺമാന്റെയും സുരക്ഷാ ഉദ്യോഗസ്ഥരുടെയും ക്രൂര മർദ്ദനമേറ്റ കെ.എസ്.യു നേതാവ് എ.ഡി. തോമസിനെ ആലപ്പുഴ നിയോജക മണ്ഡലത്തിലെ യു.ഡി.എഫ് സ്ഥാനാർത്ഥിയായി പ്രഖ്യാപിച്ചു. ഇതോടെ പഴയ മർദ്ദന ദൃശ്യങ്ങളും രാഷ്ട്രീയ വിവാദങ്ങളും വീണ്ടും ചർച്ചാവിഷയമാവുകയാണ്.
മർദ്ദിച്ചവർക്ക് മുന്നിലേക്ക് ജനപ്രതിനിധിയായി?
നവകേരള സദസിന്റെ ബസ് യാത്രയ്ക്കിടെ ആലപ്പുഴയിൽ വെച്ചാണ് തോമസിനെ മുഖ്യമന്ത്രിയുടെ സുരക്ഷാ ഉദ്യോഗസ്ഥർ ക്രൂരമായി മർദ്ദിച്ചത്. അന്ന് വലിയ രാഷ്ട്രീയ കോളിളക്കം സൃഷ്ടിച്ച ഈ സംഭവം ഇപ്പോൾ മറ്റൊരു തലത്തിലേക്ക് മാറിയിരിക്കുകയാണ്. തോമസ് എം.എൽ.എ ആയി തിരഞ്ഞെടുക്കപ്പെട്ടാൽ, പ്രോട്ടോക്കോൾ പ്രകാരം മുഖ്യമന്ത്രിയുടെ സുരക്ഷാ ഉദ്യോഗസ്ഥർക്കും ഗൺമാനും തോമസിനെ സല്യൂട്ട് ചെയ്യേണ്ടി വരും. ‘അന്ന് തല്ലിയ കൈ കൊണ്ട് ഇന്ന് സല്യൂട്ട് അടിക്കേണ്ടി വരുമോ?’ എന്ന ചോദ്യം ഇതിനോടകം തന്നെ സോഷ്യൽ മീഡിയയിലും രാഷ്ട്രീയ വൃത്തങ്ങളിലും ചർച്ചയായിക്കഴിഞ്ഞു.
യുവത്വത്തിന്റെ കരുത്തുമായി എ.ഡി. തോമസ്
കാട്ടൂർ ഹോളി ഫാമിലി സ്കൂളിൽ കെ.എസ്.യു യൂണിറ്റിലൂടെ രാഷ്ട്രീയത്തിലേക്ക് കടന്നുവന്ന തോമസ്, ചേർത്തല സെന്റ് മൈക്കിൾസ് കോളേജ് യൂണിയൻ ചെയർമാനായാണ് ശ്രദ്ധിക്കപ്പെട്ടത്. 90 ശതമാനം വോട്ടുകൾ നേടി നേടിയ ആ വിജയം തോമസിന്റെ ജനപ്രീതിക്ക് തെളിവായിരുന്നു.
പ്രധാന പദവികൾ:
- കെ.എസ്.യു ആലപ്പുഴ നിയോജക മണ്ഡലം പ്രസിഡന്റ് (ഏറ്റവും പ്രായം കുറഞ്ഞ പ്രസിഡന്റ്).
- സേവാദൾ ജില്ലാ സെക്രട്ടറി.
- ചെത്തി മത്സ്യത്തൊഴിലാളി വികസന ക്ഷേമ സഹകരണ സംഘം പ്രസിഡന്റ് (കേരളത്തിലെ ഏറ്റവും പ്രായം കുറഞ്ഞ ഫിഷറീസ് സൊസൈറ്റി പ്രസിഡന്റ്).
- കേരള യൂണിവേഴ്സിറ്റി അഡ്ജുഡിക്കേഷൻ കമ്മിറ്റി മെമ്പർ.
ആലപ്പുഴയിൽ തീപാറും പോരാട്ടം
സിറ്റിങ് എം.എൽ.എ പി.പി. ചിത്തരഞ്ജനാണ് ഇടതുമുന്നണിക്ക് വേണ്ടി വീണ്ടും കളത്തിലിറങ്ങുന്നത്. എന്നാൽ, തീരദേശ മേഖലയിലും യുവജനങ്ങൾക്കിടയിലുമുള്ള തോമസിന്റെ സ്വാധീനം എൽ.ഡി.എഫിന് വലിയ വെല്ലുവിളിയാകും. മത്സ്യത്തൊഴിലാളി കോൺഗ്രസ് ബ്ലോക്ക് വൈസ് പ്രസിഡന്റായും ഐ.എൻ.ടി.യു.സി ഭാരവാഹിയായും പ്രവർത്തിച്ച പരിചയം തീരദേശ വോട്ടുകൾ സമാഹരിക്കാൻ തോമസിനെ സഹായിക്കുമെന്നാണ് യു.ഡി.എഫ് കണക്കുകൂട്ടൽ.
കഴിഞ്ഞ ലോക്സഭാ തിരഞ്ഞെടുപ്പിൽ ആലപ്പുഴ മണ്ഡലത്തിലെ ഓരോ ബൂത്തിലും പ്രവർത്തിച്ചുള്ള സംഘടനാ മികവ് തോമസിന് പ്ലസ് പോയിന്റാണ്. പോരാട്ടവീര്യത്തിന്റെ കരുത്തിൽ ആലപ്പുഴ മണ്ഡലം തിരിച്ചുപിടിക്കാമെന്ന ഉറച്ച വിശ്വാസത്തിലാണ് യു.ഡി.എഫ് ക്യാമ്പ്.
