ന്യൂഡൽഹി: 2026-ലെ ആസാം നിയമസഭാ തിരഞ്ഞെടുപ്പിനുള്ള ആദ്യഘട്ട സ്ഥാനാർത്ഥി പട്ടിക അഖിലേന്ത്യാ കോൺഗ്രസ് കമ്മിറ്റി (AICC) പുറത്തിറക്കി. 23 മണ്ഡലങ്ങളിലേക്കുള്ള സ്ഥാനാർത്ഥികളെയാണ് പാർട്ടി കേന്ദ്ര തെരഞ്ഞെടുപ്പ് സമിതി ആദ്യഘട്ടത്തിൽ പ്രഖ്യാപിച്ചിരിക്കുന്നത്. എഐസിസി ജനറൽ സെക്രട്ടറി കെ.സി. വേണുഗോപാൽ ഔദ്യോഗികമായി പുറത്തിറക്കിയ വാർത്താക്കുറിപ്പിലാണ് ഇക്കാര്യം വ്യക്തമാക്കിയത്.
സഖ്യകക്ഷികൾക്കായി 15 സീറ്റുകൾ
സ്ഥാനാർത്ഥി പ്രഖ്യാപനത്തിനൊപ്പം തന്നെ പ്രതിപക്ഷ ഐക്യം നിലനിർത്തുന്നതിന്റെ ഭാഗമായി 15 സീറ്റുകൾ സഖ്യകക്ഷികൾക്കായി കോൺഗ്രസ് നീക്കിവെച്ചിട്ടുണ്ട്. ഗുവാഹത്തി സെൻട്രൽ, മരിഗാവ്, ദിബ്രുഗഡ്, സദിയ തുടങ്ങിയ സുപ്രധാന മണ്ഡലങ്ങൾ ഇതിൽ ഉൾപ്പെടുന്നു. സഖ്യകക്ഷികളുമായുള്ള ചർച്ചകൾക്ക് ശേഷമായിരിക്കും ഈ മണ്ഡലങ്ങളിലെ സ്ഥാനാർത്ഥികളെ തീരുമാനിക്കുക.
തിരഞ്ഞെടുപ്പ് ചൂടിലേക്ക് ആസാം
സംവരണ മണ്ഡലങ്ങളിലും ജനറൽ മണ്ഡലങ്ങളിലും കൃത്യമായ പ്രാതിനിധ്യം ഉറപ്പാക്കിയാണ് കോൺഗ്രസ് ഇത്തവണ ഗോദയിലിറങ്ങുന്നത്. വനിതാ പ്രാതിനിധ്യത്തിനും പട്ടികയിൽ പ്രാധാന്യം നൽകിയിട്ടുണ്ട്. ബിജെപി ഭരണത്തിന് കടുത്ത വെല്ലുവിളി ഉയർത്തുക എന്ന ലക്ഷ്യത്തോടെയാണ് എഐസിസി അസമിൽ കരുക്കൾ നീക്കുന്നത്. വരും ദിവസങ്ങളിൽ കൂടുതൽ പട്ടികകൾ പുറത്തുവരുമെന്നാണ് സൂചന.
