കൊച്ചി: കേരള രാഷ്ട്രീയത്തിൽ ഇടത് മുന്നണിക്ക് ഉറച്ച വേരോട്ടമുണ്ടായിരുന്ന മണ്ഡലമായിരുന്നു എറണാകുളം ജില്ലയിലെ പറവൂർ. എന്നാൽ ഇന്ന് പറവൂർ എന്ന പേരിനൊപ്പം ചേർത്തുവായിക്കപ്പെടുന്ന ഒരേയൊരു പേര് വി.ഡി സതീശൻ എന്നതാണ്. വെറുമൊരു എം.എൽ.എ എന്നതിലുപരി, മണ്ഡലത്തിലെ ഓരോ വോട്ടറുടെയും വിശ്വസ്തനായി സതീശൻ മാറിയത് കൃത്യമായ രാഷ്ട്രീയ തന്ത്രങ്ങളിലൂടെയും ജനകീയ ഇടപെടലുകളിലൂടെയുമാണ്.
തുടക്കം 1996-ൽ; വിയർത്തത് ഇടത് മുന്നണി
1996-ൽ സംസ്ഥാനമാകെ ഇടത് തരംഗം ആഞ്ഞടിച്ചപ്പോൾ, പറവൂരിലെ സിറ്റിംഗ് എം.എൽ.എ ആയിരുന്ന സി.പി.ഐയിലെ പി. രാജുവിനെതിരെയാണ് കോൺഗ്രസ് യുവനേതാവായ വി.ഡി സതീശനെ ഇറക്കിയത്. അന്ന് രാജു വിജയിച്ചെങ്കിലും സതീശൻ ഉയർത്തിയ വെല്ലുവിളിയിൽ ഇടത് ഭൂരിപക്ഷം വെറും 1116 വോട്ടായി കൂപ്പുകുത്തി. ഇത് വരാനിരിക്കുന്ന വലിയ മാറ്റത്തിന്റെ സൂചനയായിരുന്നു.
ഭൂരിപക്ഷം കൂട്ടി സതീശന്റെ കുതിപ്പ്
2001-ൽ വീണ്ടും സതീശനും രാജുവും ഏറ്റുമുട്ടിയപ്പോൾ പറവൂർ കോൺഗ്രസ് തിരിച്ചുപിടിച്ചു. പിന്നീട് നടന്ന ഓരോ തിരഞ്ഞെടുപ്പിലും സതീശൻ തന്റെ ഭൂരിപക്ഷം വർദ്ധിപ്പിച്ചുകൊണ്ടേയിരുന്നു:
- 2006: ഇടത് തരംഗത്തിലും 7,792 വോട്ടിന്റെ വിജയം.
- 2011: സതീശനെ വീഴ്ത്താൻ പന്ന്യൻ രവീന്ദ്രനെ സി.പി.ഐ ഇറക്കിയെങ്കിലും ഭൂരിപക്ഷം 11,439 ആയി ഉയർന്നു.
- 2016: കേരളം വീണ്ടും ഇടത്തോട്ട് ചിന്തിച്ചപ്പോൾ പറവൂർ സതീശന്റെ ഭൂരിപക്ഷം ഇരട്ടിയാക്കി (20,364).
- 2021: ഒടുവിൽ നടന്ന തിരഞ്ഞെടുപ്പിൽ 21,303 വോട്ടിന്റെ വൻ ഭൂരിപക്ഷത്തോടെ വിജയം ആവർത്തിച്ചു.
വിവാദങ്ങൾക്കിടയിലും ‘പുനർജനി’
വി.ഡി സതീശനെ ജനകീയനാക്കിയതിൽ പ്രധാന പങ്കുവഹിച്ചത് ‘പുനർജനി’ ഉൾപ്പെടെയുള്ള അദ്ദേഹത്തിന്റെ സാമൂഹിക പദ്ധതികളാണ്. നൂറുകണക്കിന് സാധാരണക്കാർക്ക് വീട് നിർമ്മിച്ചു നൽകിയ പുനർജനി പദ്ധതിക്കെതിരെ പലതവണ ഇടത് മുന്നണി ആരോപണങ്ങൾ ഉന്നയിച്ചിട്ടുണ്ട്. എന്നാൽ അന്വേഷണത്തെ സധൈര്യം വെല്ലുവിളിച്ച സതീശൻ, ജനകീയ അടിത്തറയിലാണ് താൻ വിശ്വസിക്കുന്നതെന്ന് തെളിയിച്ചു.
2026-ലേക്ക് ഉറ്റുനോക്കി കേരളം
അടുത്ത നിയമസഭാ തിരഞ്ഞെടുപ്പ് അടുത്തിരിക്കെ, ഭരണവിരുദ്ധ വികാരത്തിൽ പതറുന്ന ഇടത് മുന്നണി പുനർജനി പദ്ധതിയിൽ സി.ബി.ഐ അന്വേഷണം കൊണ്ടുവരുന്നത് രാഷ്ട്രീയ പ്രേരിതമാണെന്ന ആരോപണം ശക്തമാണ്. എന്നാൽ ഇത്തരം രാഷ്ട്രീയ നീക്കങ്ങളെ അതിജീവിച്ച് 2026-ൽ പറവൂരും കേരളവും വി.ഡി സതീശനൊപ്പം നിൽക്കുമെന്ന ആത്മവിശ്വാസത്തിലാണ് യു.ഡി.എഫ് ക്യാമ്പ്. പത്തു വർഷത്തെ ഇടവേളയ്ക്ക് ശേഷം സതീശന്റെ ചിറകിലേറി ഐക്യമുന്നണി അധികാരം പിടിക്കുമോ എന്നാണ് ഇനി അറിയേണ്ടത്.
