ന്യൂസിലാൻഡ് : പുതുവർഷ ലഹരിയിലേക്ക് ചുവടുവെക്കുമ്പോൾ, 2026-നെ ആദ്യമായി വരവേറ്റ് ന്യൂസിലാൻഡ്. ഓക്ലൻഡിലെ സ്കൈ ടവറിൽ നടന്ന വർണ്ണാഭമായ വെടിക്കെട്ടോടെയാണ് പസഫിക് രാഷ്ട്രമായ ന്യൂസിലാൻഡ് പുതുവർഷത്തെ എതിരേറ്റത്. ആയിരക്കണക്കിന് ആളുകളാണ് ഓക്ലൻഡ് ഹാർബറിൽ ഈ ദൃശ്യവിസ്മയം നേരിൽ കാണാൻ ഒത്തുകൂടിയത്.
സ്കൈ ടവറിൽ നിന്ന് ആകാശത്തേക്ക് ഉയർന്ന മനോഹരമായ അഗ്നിപൂത്തിരികൾ നഗരത്തെ പകൽ വെളിച്ചത്തിന് സമാനമായ പ്രഭയിൽ മുക്കി. കൃത്യം 12 മണിക്ക് കൗണ്ട് ഡൗൺ അവസാനിച്ചതോടെ സംഗീതത്തിന്റെയും ആവേശത്തിന്റെയും അകമ്പടിയോടെ ആഘോഷങ്ങൾ പാരമ്യത്തിലെത്തി. കോവിഡ് ഭീതികൾക്ക് ശേഷമുള്ള ഏറ്റവും വലിയ ജനപങ്കാളിത്തമാണ് ഇത്തവണ ഓക്ലൻഡിൽ ഉണ്ടായതെന്നാണ് റിപ്പോർട്ടുകൾ.
ന്യൂസിലാൻഡിന് പിന്നാലെ അയൽരാജ്യമായ ഓസ്ട്രേലിയയും പുതുവർഷാഘോഷങ്ങളിലേക്ക് കടക്കും. സിഡ്നി ഹാർബർ ബ്രിഡ്ജിലെ വിശ്വപ്രസിദ്ധമായ വെടിക്കെട്ട് കാണാൻ ലക്ഷക്കണക്കിന് ആളുകളാണ് കാത്തിരിക്കുന്നത്. ജപ്പാൻ, ദക്ഷിണ കൊറിയ തുടങ്ങിയ രാജ്യങ്ങളാണ് അടുത്തതായി 2026-ലേക്ക് പ്രവേശിക്കുക. ലോകമെമ്പാടുമുള്ള പ്രധാന നഗരങ്ങളെല്ലാം അതീവ സുരക്ഷയിലും വലിയ ആഘോഷാരവങ്ങളിലുമാണ്.
