മുംബൈ: ആരാധകർ കാത്തിരുന്ന ആ പ്രഖ്യാപനം എത്തിക്കഴിഞ്ഞു. 2026-ലെ ടി20 ലോകകപ്പിനുള്ള 15 അംഗ ഇന്ത്യൻ ടീമിനെ ബിസിസിഐ പ്രഖ്യാപിച്ചു. മലയാളി താരം സഞ്ജു സാംസൺ ടീമിൽ ഇടം നേടിയതാണ് ക്രിക്കറ്റ് ലോകത്തെ പ്രധാന വാർത്ത. മികച്ച ഫോമിലല്ലാത്ത ശുഭ്മാൻ ഗില്ലിനെ ഒഴിവാക്കിയ സെലക്ഷൻ കമ്മിറ്റി, സഞ്ജുവിനെ ഫസ്റ്റ് ചോയ്സ് വിക്കറ്റ് കീപ്പറായി ടീമിൽ ഉൾപ്പെടുത്തിയിരിക്കുകയാണ്.
സൂര്യകുമാർ യാദവ് നയിക്കുന്ന ടീമിൽ അക്സർ പട്ടേലാണ് വൈസ് ക്യാപ്റ്റൻ. വിക്കറ്റ് കീപ്പറായി സഞ്ജുവിനൊപ്പം ഇഷാൻ കിഷനും ടീമിൽ തിരിച്ചെത്തിയിട്ടുണ്ട്. ദക്ഷിണാഫ്രിക്കൻ പരമ്പരയിൽ നടത്തിയ മിന്നും പ്രകടനവും സയ്യിദ് മുഷ്താഖ് അലി ട്രോഫിയിലെ ഫോമും സഞ്ജുവിനെ ടീമിൽ നിലനിർത്താൻ സഹായിച്ചു.
അഭിഷേക് ശർമ്മ, ഹാർദിക് പാണ്ഡ്യ, ശിവം ദുബെ, റിങ്കു സിംഗ് എന്നിവർ ബാറ്റിംഗിന് കരുത്തുപകരുമ്പോൾ ജസ്പ്രീത് ബുംറ നയിക്കുന്ന ബൗളിംഗ് നിരയിൽ കുൽദീപ് യാദവ്, വരുൺ ചക്രവർത്തി എന്നിവരും ഇടം പിടിച്ചു. ഫെബ്രുവരി 7-ന് ഇന്ത്യയിലും ശ്രീലങ്കയിലുമായിട്ടാണ് ലോകകപ്പ് മത്സരങ്ങൾ ആരംഭിക്കുന്നത്.
