തിരുവനന്തപുരം: തിരുവനന്തപുരം കോർപ്പറേഷൻ തെരഞ്ഞെടുപ്പ് (Thiruvananthapuram Corporation Election) സംസ്ഥാന രാഷ്ട്രീയത്തിലെ ശ്രദ്ധാകേന്ദ്രമായി മാറുന്നു. കോൺഗ്രസ് നേതാവ് കെ. മുരളീധരൻ്റെ (K. Muraleedharan) നേതൃത്വത്തിൽ കോൺഗ്രസ് (Congress) ചടുലമായ പ്രചാരണ തന്ത്രങ്ങളുമായി മുന്നോട്ട് വന്നതോടെ സി.പി.എം. (CPM) വെട്ടിലായി. സ്ഥാനാർത്ഥികളെ മുൻകൂട്ടി പ്രഖ്യാപിച്ചുകൊണ്ടുള്ള മുരളീധരൻ്റെ നീക്കത്തിൽ സി.പി.എം. ക്യാമ്പ് പകച്ചുനിൽക്കുകയാണ്.
തിരുവനന്തപുരം ജില്ലയുടെ സ്പന്ദനം കൃത്യമായി അറിയാവുന്ന കെ. മുരളീധരനെ നേരിടാൻ താഴെത്തലത്തിലുള്ള നേതാക്കൾക്ക് കഴിയില്ലെന്ന് മനസ്സിലാക്കിയ സി.പി.എം. മുഖ്യമന്ത്രി പിണറായി വിജയനെ (Pinarayi Vijayan) തന്നെ നേരിട്ട് തന്ത്രങ്ങൾ മെനയാൻ രംഗത്തിറക്കി.
ഈ രാഷ്ട്രീയ പോരാട്ടത്തിൻ്റെ പശ്ചാത്തലത്തിലാണ് നീണ്ട കാത്തിരിപ്പിനൊടുവിൽ തിരുവനന്തപുരം മെട്രോ റെയിലിൻ്റെ (Thiruvananthapuram Metro Rail) ആദ്യ ഘട്ട അലൈൻമെൻ്റിന് ഇന്നലെ പിണറായി വിജയൻ അംഗീകാരം നൽകിയത്. ഈ നീക്കം വരാനിരിക്കുന്ന തെരഞ്ഞെടുപ്പ് ലക്ഷ്യം വെച്ചുള്ളതാണെന്നാണ് പൊതുവെയുള്ള വിലയിരുത്തൽ. ഇത്രയും നാൾ വൈകിപ്പിച്ച ഒരു പദ്ധതിക്ക് ഇപ്പോൾ അനുമതി നൽകിയത് “തെരഞ്ഞെടുപ്പ് സ്റ്റണ്ട്” ആണെന്ന് കെ. മുരളീധരൻ തുറന്നടിച്ചു.
എന്തായാലും, പിണറായി – മുരളി നേർക്ക് നേർ പോരാട്ടമാകും തലസ്ഥാന കോർപ്പറേഷൻ തെരഞ്ഞെടുപ്പിൽ ഇനി കാണാൻ പോകുന്നത്. ഇത് തെരഞ്ഞെടുപ്പ് ചൂട് വർദ്ധിപ്പിക്കുമെന്ന കാര്യത്തിൽ സംശയമില്ല.
