ബെംഗളൂരു: കർണാടക മന്ത്രിസഭാ വികസനവുമായി ബന്ധപ്പെട്ട് രാഷ്ട്രീയ നീക്കങ്ങൾ സജീവമാകുന്നു. 34 അംഗ മന്ത്രിസഭയിൽ വനിതകൾ ഇല്ലാത്തത് വലിയ ചർച്ചയായ സാഹചര്യത്തിൽ, മുഖ്യമന്ത്രി ഡി.കെ. ശിവകുമാറിന്റെ നേതൃത്വത്തിലുള്ള സർക്കാരിൽ ഉടൻതന്നെ ഒരു വനിതാ മന്ത്രിയെ ഉൾപ്പെടുത്തിയേക്കുമെന്ന് സൂചനയുണ്ട്. ഇതിന് മുന്നോടിയായി ഭരണപക്ഷത്ത് സീറ്റിനായുള്ള ലോബിയിങ് ശക്തമായിക്കഴിഞ്ഞു.
മുൻ മന്ത്രി ലക്ഷ്മി ഹെബ്ബാൾക്കർ വീണ്ടും മന്ത്രിസ്ഥാനം ലക്ഷ്യമിട്ട് രംഗത്തുണ്ട്. കൂടാതെ അന്നപൂർണ തുക്കാറാം, രൂപ ശശിധർ, നയന മൊട്ടമ്മ, ആരതി കൃഷ്ണ എന്നിവരുടെ പേരുകളും ശക്തമായി കേൾക്കുന്നുണ്ട്.
രൂപ ശശിധറിന്റെ പിതാവ് കെ.എച്ച്. മുനിയപ്പ മന്ത്രിസഭയിൽ ഉള്ളത് അവരുടെ സാധ്യതകൾക്ക് തിരിച്ചടിയായേക്കാമെന്ന് വിലയിരുത്തപ്പെടുന്നു. നയന മൊട്ടമ്മ, ആരതി കൃഷ്ണ എന്നിവർ ആദ്യമായി എം.എൽ.എമാരായവരായതിനാൽ സാധ്യതകൾ കുറവാണെന്നും വിലയിരുത്തപ്പെടുന്നു. അതേസമയം, ബല്ലാരി എം.പി ഇ. തുക്കാറാമിന്റെ ഭാര്യയും പ്രഥമ വനിതാ എം.എൽ.ഇയുമായ അന്നപൂർണ തുക്കാറാമിന്റെ പേരിനാണ് പാർട്ടി കേന്ദ്രങ്ങളിൽ മുൻഗണന ലഭിക്കുന്നത്. ഇവരെ മന്ത്രിയാക്കുന്നതിലൂടെ ബല്ലാരിയുടെ പ്രാതിനിധ്യവും ഒപ്പം പട്ടികവർഗ്ഗ (എസ്ടി) വിഭാഗത്തിന് അർഹമായ പ്രാതിനിധ്യവും ഉറപ്പാക്കാൻ കഴിയുമെന്നാണ് കോൺഗ്രസ് നേതൃത്വത്തിന്റെ വിലയിരുത്തൽ. അന്തിമ തീരുമാനം ഹൈക്കമാൻഡിന്റേതായിരിക്കുമെന്ന് പാർട്ടി വൃത്തങ്ങൾ വ്യക്തമാക്കുന്നു.
