കൊച്ചി: പൃഥ്വിരാജ് സുകുമാരൻ കേന്ദ്രകഥാപാത്രമാകുന്ന പുതിയ ചിത്രം ‘ഖലീഫ’യുടെ പ്രമോഷനുമായി ബന്ധപ്പെട്ട് കേരളത്തിലെത്തിയ നടി മാളവിക ശർമയോട് മാധ്യമപ്രവർത്തകൻ ചോദിച്ച ചോദ്യം വലിയ ചർച്ചകൾക്ക് വഴിവെക്കുന്നു. കൊച്ചിയിൽ നടന്ന പ്രമോഷൻ പരിപാടിക്കിടെ ‘കേരളത്തിലെ ബീഫ് കഴിച്ചോ, ഇഷ്ടപ്പെട്ടോ’ എന്നായിരുന്നു ഒരു റിപ്പോർട്ടറുടെ ചോദ്യം.
ചോദ്യം കേട്ട് അല്പം അമ്പരന്നെങ്കിലും താൻ പൂർണമായും സസ്യാഹാരിയാണെന്നും അതിനാൽ ഇതുവരെ ബീഫ് കഴിച്ചിട്ടില്ലെന്നും മാളവിക ചിരിയോടെ മറുപടി നൽകി. മഹാരാഷ്ട്ര സ്വദേശിയായ മാളവിക ശർമയുടെ മലയാളത്തിലെ അരങ്ങേറ്റ ചിത്രമാണ് ഖലീഫ.
എന്നാൽ, സിനിമയുടെ പ്രമോഷനുമായി യാതൊരു ബന്ധവുമില്ലാത്ത ഇത്തരമൊരു ചോദ്യം ഉന്നയിച്ചതിനെതിരെ സോഷ്യൽ മീഡിയയിൽ രൂക്ഷമായ വിമർശനമാണ് ഉയരുന്നത്. അന്യസംസ്ഥാനങ്ങളിൽ നിന്നുമെത്തുന്ന അഭിനേതാക്കൾക്ക് മുന്നിൽ ഭക്ഷണശീലങ്ങളെ മുൻനിർത്തി ചോദ്യങ്ങൾ ഉന്നയിക്കുന്നത് കേരള മാധ്യമങ്ങളുടെ തെറ്റായ പ്രവണതയാണെന്ന് ഒരു വിഭാഗം ചൂണ്ടിക്കാട്ടുന്നു. അതേസമയം, കേരളത്തിന്റെ തനത് രുചികളെക്കുറിച്ചുള്ള സാധാരണ കൗതുകം മാത്രമാണ് റിപ്പോർട്ടർ പങ്കുവെച്ചതെന്ന വാദവും ഉയരുന്നുണ്ട്.
