റോസാരിയോ: 2026 ഫിഫ ലോകകപ്പ് ഫൈനലിലേറ്റ കടുത്ത തോൽവിയുടെ നിരാശയിൽ നിന്ന് കരകയറുന്നതിനിടെ, അർജന്റീന നായകൻ ലയണൽ മെസ്സി ആദ്യമായി പൊതുവേദിയിൽ പ്രത്യക്ഷപ്പെട്ടു. സ്വന്തം ജന്മനാടായ റോസാരിയോയ്ക്ക് സമീപമുള്ള അറോയോ സെക്കോയിൽ കുടുംബത്തോടൊപ്പം സമയം ചെലവഴിക്കുന്ന മെസ്സി, ശനിയാഴ്ച പ്രാദേശിക ഫുട്ബോൾ മത്സരം കാണാനാണ് സ്റ്റേഡിയത്തിലെത്തിയത്.
സ്വന്തം കുടുംബം നടത്തുന്ന ‘ലിയോണസ് എഫ്.സി’ (Leones FC) പ്രിമേറ സി ലീഗിൽ സെൻട്രൽ കോർഡോബയ്ക്കെതിരെ (Central Cordoba) ഏറ്റുമുട്ടിയപ്പോഴാണ് മെസ്സി അന്റോണിയോ ഡി ഗിയാക്കോമോ സ്റ്റേഡിയത്തിലെത്തിയത്. കറുത്ത ഹൂഡി ധരിച്ച് ആളുകൾ തിരിച്ചറിയാത്ത വിധത്തിൽ രഹസ്യമായി കളി കാണാനാണ് മെസ്സി ശ്രമിച്ചതെങ്കിലും ആരാധകരുടെ കണ്ണിൽപ്പെടുകയായിരുന്നു.
സ്റ്റേഡിയത്തിന്റെ ബാൽക്കണിയിൽ നിന്ന് മക്കളോടൊപ്പം കളി കാണുകയായിരുന്ന മെസ്സിയെ തിരിച്ചറിഞ്ഞ ആരാധകർ ആർപ്പുവിളികളോടെ വരവേറ്റു. തുടര്ന്ന് ആരാധകർക്ക് നേരെ പുഞ്ചിരിക്കുകയും കൈവീശി കാണിക്കുകയും ചെയ്ത മെസ്സിയുടെ വീഡിയോകൾ നിമിഷങ്ങൾക്കകം സോഷ്യൽ മീഡിയയിൽ തരംഗമായി മാറി.
മത്സരത്തിൽ ലിയോണസ് എഫ്.സി 2-0 ന് പരാജയപ്പെട്ടെങ്കിലും, പ്രിയതാരത്തെ നേരിട്ട് കാണാൻ സാധിച്ചതിന്റെ ആവേശത്തിലായിരുന്നു സ്റ്റേഡിയത്തിലുണ്ടായിരുന്ന ആരാധകർ. ന്യൂയോർക്കിൽ നടന്ന ലോകകപ്പ് ഫൈനലിന് ശേഷം മാധ്യമങ്ങൾക്ക് മുന്നിൽ വരാതിരുന്ന മെസ്സിയുടെ ഈ സാന്നിധ്യം ഫുട്ബോൾ ലോകത്ത് വലിയ ശ്രദ്ധ നേടിക്കഴിഞ്ഞു.
