തിരുവനന്തപുരം: മുതിർന്ന കോൺഗ്രസ് നേതാവ് രമേശ് ചെന്നിത്തലയുടെ കുടുംബത്തിലേക്ക് പുതിയൊരു സന്തോഷം കൂടി എത്തിയിരിക്കുകയാണ്. ചെന്നിത്തല വീണ്ടും അപ്പൂപ്പനായി. മൂത്തമകൻ ഡോ. രോഹിതിനും ഭാര്യ ശ്രീജയ്ക്കും രണ്ടാമത്തെ ആൺകുഞ്ഞ് ജനിച്ച വിവരമാണ് അദ്ദേഹം സമൂഹമാധ്യമത്തിലൂടെ സന്തോഷത്തോടെ പങ്കുവെച്ചത്.
മൂത്ത കൊച്ചുമകൻ രോഹന് ഒരു അനിയൻ കൂടിയെത്തിയതിന്റെ ആഹ്ലാദത്തിലാണ് കുടുംബം. തിരക്കുപിടിച്ച രാഷ്ട്രീയ-പൊതുപ്രവർത്തന ജീവിതത്തിനിടയിൽ ഇത്തരം നിമിഷങ്ങൾ അപൂർവ്വവും വിലപ്പെട്ടതുമായ നിധിയാണെന്ന് ചെന്നിത്തല കുറിച്ചു. ദൈവാനുഗ്രഹത്താൽ കുഞ്ഞും അമ്മയും സുഖമായിരിക്കുന്നുവെന്നും അദ്ദേഹം ഫേസ്ബുക്കിൽ കുറിച്ചു.
ഫേസ്ബുക്ക് കുറിപ്പിന്റെ പൂർണ്ണരൂപം:
“എന്റെ കുടുംബത്തിന് ഇന്ന് അത്യധികം ആഹ്ളാദമുള്ള ദിവസമാണ്. എന്റെ മൂത്തമകന് ഡോ. രോഹിതിന് ഒരു മകന് കൂടി ജനിച്ചു. രോഹന് വാവക്ക് ഒരു അനിയനെ കിട്ടി. തിരക്കേറിയ പൊതുജീവിതത്തിനിടയില് ഇത്തരം സന്തോഷങ്ങള് ഒരു നിധി പോലെ വീണുകിട്ടുന്നതാണ്. ഈശ്വരാനുഗ്രഹത്താല് കുഞ്ഞുമകനും മകൾ ശ്രീജയും സുഖമായിരിക്കുന്നു.”
ചെന്നിത്തല കുറിപ്പ് പങ്കുവെച്ചതിന് പിന്നാലെ നിരവധി സഹപ്രവർത്തകരും പാർട്ടി പ്രവർത്തകരും പൊതുജനങ്ങളും അദ്ദേഹത്തിനും കുടുംബത്തിനും ആശംസകളുമായി രംഗത്തെത്തിയിട്ടുണ്ട്.
