മുംബൈ / ജാൽന: ട്രെയിൻ യാത്ര കൂടുതൽ മനോഹരമാക്കാൻ നവദമ്പതികൾ ഒരുക്കിയ ഒരു റൊമാന്റിക് സർപ്രൈസ് ഒടുവിൽ റെയിൽവേ ജീവനക്കാരന്റെ ജോലി തെറിപ്പിച്ചു. ഒന്നാം ക്ലാസ് എസി (First AC) കൂപ്പെ ലക്ഷ്വറി ‘ഹണിമൂൺ സ്യൂട്ട്’ പോലെ അലങ്കരിച്ച വീഡിയോ സോഷ്യൽ മീഡിയയിൽ വൈറലായതിന് പിന്നാലെ ഡ്യൂട്ടിയിലുണ്ടായിരുന്ന ചീഫ് ടിക്കറ്റ് ഇൻസ്പെക്ടറെ (TTE) ഇന്ത്യൻ റെയിൽവേ അടിയന്തരമായി സസ്പെൻഡ് ചെയ്തു. സംഭവത്തിൽ ഉന്നതതല വകുപ്പുതല അന്വേഷണത്തിനും റെയിൽവേ ഉത്തരവിട്ടിട്ടുണ്ട്.
മുംബൈ സിഎസ്എംടി – ബൽഹർഷ നന്ദിഗ്രാം എക്സ്പ്രസിൽ (ട്രെയിൻ നമ്പർ 11002) മഹാരാഷ്ട്രയിലെ ജാൽന റെയിൽവേ സ്റ്റേഷനിൽ വെച്ചാണ് സംഭവം നടന്നത്.
’സുഹാഗ്രാത് എക്സ്പ്രസ്’
സോഷ്യൽ മീഡിയയിൽ പ്രചരിക്കുന്ന വീഡിയോയിൽ, ട്രെയിനിലെ ഫസ്റ്റ് എസി ക്യാബിൻ പൂർണ്ണമായും ഒരു മധുവിധു റൂം പോലെ മാറ്റിമറിച്ചതായി കാണാം. മേൽക്കൂരയിൽ ചുവപ്പും വെള്ളയും ബലൂണുകൾ നിറച്ചിരിക്കുന്നു, താഴത്തെ ബർത്തുകളിൽ വെള്ള വിരിപ്പുകൾ വിരിച്ച് അതിന് മുകളിൽ റോസാപ്പൂ ഇതളുകൾ കൊണ്ട് ഹൃദയാകൃതിയിലുള്ള ഡിസൈനുകൾ ഒരുക്കിയിട്ടുണ്ട്. തറയിലാകെ റോസാപ്പൂ ഇതളുകൾ വിതറിയിരിക്കുകയാണ്. കൂടാതെ ക്യാബിന്റെ ചുവരുകളിൽ എൽഇഡി ഫെയറി ലൈറ്റുകളും “ഐ ലവ് യൂ” (I Love You) എന്ന വലിയൊരു സന്ദേശവും പതിപ്പിച്ചിട്ടുണ്ട്.
സോഷ്യൽ മീഡിയയിൽ പലരും ഇതിനെ തമാശയായി ‘സുഹാഗ്രാത് എക്സ്പ്രസ്’ എന്നും ‘ഹണിമൂൺ ഓൺ വീൽസ്’ എന്നും വിളിച്ചപ്പോൾ, ഒരു വിഭാഗം ആളുകൾ ഇത് വലിയ സുരക്ഷാ ഭീഷണിയാണെന്ന് ചൂണ്ടിക്കാട്ടി രംഗത്തെത്തി.
റെയിൽവേയുടെ നടപടിയും സുരക്ഷാ വീഴ്ചയും
യാത്രക്കാർ മുഴുവൻ തുക നൽകി രണ്ട് ബർത്തുകളുള്ള കൂപ്പെ പൂർണ്ണമായി ബുക്ക് ചെയ്താണ് യാത്ര ചെയ്തതെങ്കിലും, റെയിൽവേ ഈ സംഭവത്തെ വളരെ ഗൗരവമേറിയ ഒരു സുരക്ഷാ വീഴ്ചയായാണ് കണക്കാക്കുന്നത്. കമ്പാർട്ടുമെന്റ് അലങ്കരിച്ചതല്ല, മറിച്ച് അതിനായി പുറത്തുനിന്നുള്ള ആളുകൾക്ക് അനധികൃതമായി ട്രെയിനിനുള്ളിൽ പ്രവേശിക്കാൻ അനുവാദം നൽകിയതാണ് റെയിൽവേയെ ചൊടിപ്പിച്ചത്.
ഒരു സ്വകാര്യ ഓൺലൈൻ ഇവന്റ് ഡെക്കറേഷൻ കമ്പനിയെയാണ് ദമ്പതികൾ ഇതിനായി ചുമതലപ്പെടുത്തിയത്. ജാൽന സ്റ്റേഷനിൽ ട്രെയിൻ നിർത്തിയിട്ടിരുന്ന സമയത്ത് ഈ ഡെക്കറേഷൻ സംഘം യാതൊരുവിധ അനുമതിയുമില്ലാതെ ഫസ്റ്റ് എസി കോച്ചിൽ കയറി ദീർഘനേരം അലങ്കാരപ്പണികൾ നടത്തുകയായിരുന്നു.
”ജാൽന സ്റ്റേഷനിൽ ഡെക്കറേറ്റർ കോച്ചിൽ പ്രവേശിച്ചത് അനധികൃതമായാണ്. ഇത് അതീവ ഗുരുതരമായ സുരക്ഷാ വീഴ്ചയായി കണക്കാക്കുന്നു. ഡ്യൂട്ടിയിലുണ്ടായിരുന്ന ടിക്കറ്റ് പരിശോധകനെ സസ്പെൻഡ് ചെയ്തിട്ടുണ്ട്. വിശദമായ അന്വേഷണത്തിന് ശേഷം കൂടുതൽ നടപടികൾ സ്വീകരിക്കും,” സൗത്ത് സെൻട്രൽ റെയിൽവേ (SCR) ഔദ്യോഗിക പ്രസ്താവനയിലൂടെ അറിയിച്ചു.
ട്രെയിൻ പുറപ്പെടുന്നതിന് മുൻപ് തന്നെ ഡെക്കറേഷൻ സംഘം അവിടെ നിന്നും മാറിയിരുന്നു. സംഭവത്തെ തുടർന്ന് റെയിൽവേ പ്രൊട്ടക്ഷൻ ഫോഴ്സ് (RPF) ഇവന്റ് ഡെക്കറേറ്ററെ വിളിച്ചുവരുത്തുകയും, ടിക്കറ്റില്ലാതെ ട്രെയിനിൽ കയറിയതിനും അതിക്രമിച്ചു കടന്നതിനും റെയിൽവേ ആക്ട് 1989 പ്രകാരം കേസ് രജിസ്റ്റർ ചെയ്യുകയും ചെയ്തിട്ടുണ്ട്.
