ആലപ്പുഴ: നിയമസഭാ തിരഞ്ഞെടുപ്പിന് ആറ് ദിവസം മാത്രം ബാക്കി നിൽക്കെ, സംസ്ഥാന രാഷ്ട്രീയത്തിന്റെ കണ്ണാടിയായ ആലപ്പുഴ ജില്ലയിൽ ഭരണകക്ഷിയായ സി പി എമ്മിന് കനത്ത തിരിച്ചടി. ഇടതുപക്ഷത്തിന്റെ ഉരുക്കുകോട്ടയായി അറിയപ്പെടുന്ന ആലപ്പുഴയിൽ ഇത്തവണ യുഡിഎഫ് വൻ മുന്നേറ്റമാണ് നടത്തുന്നത്. ജില്ലയിലെ 9 മണ്ഡലങ്ങളിൽ 6 ഇടത്തും യുഡിഎഫ് വ്യക്തമായ മേൽക്കൈ നേടിക്കഴിഞ്ഞു.
കോട്ടകളിൽ വിള്ളൽ; 6 മണ്ഡലങ്ങളിൽ യുഡിഎഫ് ആധിപത്യം
2021-ലെ തിരഞ്ഞെടുപ്പിൽ രമേശ് ചെന്നിത്തല വിജയിച്ച ഹരിപ്പാട് മാത്രമായിരുന്നു യുഡിഎഫിന് ജില്ലയിൽ ആശ്വസിക്കാൻ വക നൽകിയിരുന്നത്. എന്നാൽ ഇത്തവണ ചിത്രം പൂർണ്ണമായും മാറിയിരിക്കുകയാണ്. നിലവിലെ രാഷ്ട്രീയ സാഹചര്യങ്ങൾ പരിശോധിക്കുമ്പോൾ അരൂർ, ആലപ്പുഴ, അമ്പലപ്പുഴ, ഹരിപ്പാട്, കായംകുളം, കുട്ടനാട് എന്നീ മണ്ഡലങ്ങളിൽ യുഡിഎഫ് വിജയം ഉറപ്പിച്ചു കഴിഞ്ഞു. ചിട്ടയായ പ്രവർത്തനവും ഭരണവിരുദ്ധ വികാരവും ഈ മണ്ഡലങ്ങളിൽ പ്രതിഫലിക്കുന്നുണ്ട്.
മൂന്നിടത്ത് ഇഞ്ചോടിഞ്ച് പോരാട്ടം
ബാക്കിയുള്ള മൂന്ന് മണ്ഡലങ്ങളിൽ പ്രവചനാതീതമായ പോരാട്ടമാണ് നടക്കുന്നത്. ചെങ്ങന്നൂർ, ചേർത്തല, മാവേലിക്കര എന്നീ മണ്ഡലങ്ങളിലാണ് ഇത്തവണ തീപാറുന്ന പോരാട്ടം നടക്കുന്നത്. കഴിഞ്ഞ തവണ ഇടതുപക്ഷം വൻ ഭൂരിപക്ഷത്തിന് ജയിച്ച ഈ മണ്ഡലങ്ങളിൽ ഇത്തവണ യുഡിഎഫ് സ്ഥാനാർത്ഥികൾ വലിയ വെല്ലുവിളിയാണ് ഉയർത്തുന്നത്.
തിരിച്ചടിയാകുന്നത് ‘ഭരണവിരുദ്ധ വികാരം’
പിണറായി വിജയൻ സർക്കാരിന്റെ രണ്ടാം ഊഴത്തിലെ ഭരണപരാജയവും ജനങ്ങളോടുള്ള വെല്ലുവിളികളും ആലപ്പുഴയിൽ ചർച്ചയാകുന്നുണ്ട്. ജനജീവിതം ദുസ്സഹമാക്കിയ നികുതി വർദ്ധനവും അഴിമതി ആരോപണങ്ങളും സാധാരണക്കാരായ വോട്ടർമാരെ സർക്കാരിൽ നിന്ന് അകറ്റിയതായാണ് വിലയിരുത്തൽ. ഈ ജനവികാരം വോട്ടായി മാറുന്നത് ജില്ലയിൽ യുഡിഎഫിന് വലിയ മുതൽക്കൂട്ടായി മാറിയിട്ടുണ്ട്. ജി. സുധാകരൻ പാർട്ടി വിട്ട് അമ്പലപ്പുഴയിൽ മൽസരിക്കുന്നത് യു.ഡി എഫിന് ജില്ലയിൽ മൊത്തത്തിൽ ഗുണം ചെയ്തു.
ജില്ലയിലെ മുതിർന്ന നേതാക്കളുടെ സജീവമായ പ്രചാരണവും യുവജനങ്ങളുടെ പിന്തുണയും യുഡിഎഫിന് അനുകൂലമായ കാറ്റ് വീശാൻ കാരണമായി. വരും ദിവസങ്ങളിൽ പ്രചാരണം കൂടുതൽ ശക്തമാകുന്നതോടെ ബാക്കിയുള്ള മണ്ഡലങ്ങളിലും അട്ടിമറി വിജയം നേടാമെന്ന പ്രതീക്ഷയിലാണ് യുഡിഎഫ് കേന്ദ്രങ്ങൾ.
