കൊല്ലം: സാംസ്കാരിക വകുപ്പിന്റെ നേതൃത്വത്തിൽ കൊല്ലം ശ്രീനാരായണ ഗുരു സമുച്ചയത്തിൽ നടന്ന പ്രതിമ അനാച്ഛാദന ചടങ്ങിൽ നിന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ വിട്ടുനിന്നു. മുഖ്യമന്ത്രി പിണറായി വിജയൻ മുഖ്യാതിഥിയായി എത്തിയ പരിപാടിയിൽ വെള്ളാപ്പള്ളിയുടെ അഭാവം രാഷ്ട്രീയ കേന്ദ്രങ്ങളിൽ വലിയ ചർച്ചയായിരിക്കുകയാണ്.
മുഖ്യമന്ത്രി പങ്കെടുക്കുന്ന പരിപാടിയായതിനാൽ വലിയ ജനപങ്കാളിത്തമാണ് സംഘാടകർ പ്രതീക്ഷിച്ചിരുന്നത്. ആയിരത്തിലധികം പേർ എത്തുമെന്ന് കരുതിയിരുന്ന ചടങ്ങിൽ നാലിലൊന്ന് ആളുകൾ പോലും എത്തിയില്ല എന്നത് സർക്കാരിന് തിരിച്ചടിയായി. പരിപാടിയിൽ പങ്കെടുത്തവരിൽ ഭൂരിഭാഗവും സാംസ്കാരിക വകുപ്പിലെ ഉദ്യോഗസ്ഥരായിരുന്നു എന്നത് ജനപങ്കാളിത്തത്തിന്റെ കുറവ് വ്യക്തമാക്കുന്നു.
സംസ്ഥാനത്ത് ഭരണവിരുദ്ധ വികാരം ശക്തമാകുന്നതിന്റെ സൂചനയാണിതെന്ന് രാഷ്ട്രീയ നിരീക്ഷകർ വിലയിരുത്തുന്നു. മുഖ്യമന്ത്രി പങ്കെടുക്കുന്ന പൊതുപരിപാടികളിൽ നിന്ന് ജനങ്ങൾ വിട്ടുനിൽക്കുന്നത് സർക്കാരിന്റെ ജനപ്രീതിയിലുണ്ടായ ഇടിവാണ് കാണിക്കുന്നത്. ശ്രീനാരായണ ഗുരുവിന്റെ പേരിലുള്ള സമുച്ചയത്തിലെ ചടങ്ങിൽ സമുദായ നേതാവായ വെള്ളാപ്പള്ളി നടേശൻ കൂടി വിട്ടുനിന്നതോടെ പരിപാടിയുടെ നിറം മങ്ങി.
