തിരുവനന്തപുരം: പോറ്റിയെ ഇന്ന് പ്രത്യേക അന്വേഷണ സംഘം (SIT) കസ്റ്റഡിയിൽ വാങ്ങും. കടകംപള്ളിയും പോറ്റിയും നൽകിയ മൊഴികളിലെ പ്രകടമായ വൈരുദ്ധ്യമാണ് അന്വേഷണസംഘത്തെ ഇത്തരമൊരു നീക്കത്തിന് പ്രേരിപ്പിക്കുന്നത്.
കടകംപള്ളി സുരേന്ദ്രനും പോറ്റിയും വിവിധ സ്ഥലങ്ങളിൽ വച്ച് കൂടിക്കാഴ്ച നടത്തിയതായി അന്വേഷണസംഘം കണ്ടെത്തിയിട്ടുണ്ട്. എന്നാൽ, പോറ്റിയുമായുള്ള ബന്ധത്തെക്കുറിച്ച് കടകംപള്ളി നൽകിയ വിശദീകരണങ്ങളിൽ പലതും വസ്തുതാവിരുദ്ധമാണെന്നാണ് എസ്.ഐ.ടിയുടെ വിലയിരുത്തൽ. പല നിർണ്ണായക വിവരങ്ങളും അദ്ദേഹം മറച്ചുവെക്കുന്നതായും ഉദ്യോഗസ്ഥർ സംശയിക്കുന്നു.
വിദേശയാത്രകളും നിഴലിൽ
മന്ത്രിയായിരുന്ന കാലയളവിൽ കടകംപള്ളി സുരേന്ദ്രൻ നടത്തിയ വിദേശയാത്രകളുടെ പൂർണ്ണരൂപം എസ്.ഐ.ടി ശേഖരിച്ചുവരികയാണ്. ഈ യാത്രകളിൽ പോറ്റിയുടെ സാന്നിധ്യമുണ്ടായിരുന്നോ എന്നും സാമ്പത്തിക ഇടപാടുകൾ നടന്നിട്ടുണ്ടോ എന്നും സംഘം പരിശോധിക്കുന്നുണ്ട്. പോറ്റിയെ കസ്റ്റഡിയിൽ വാങ്ങി കൂടുതൽ ചോദ്യം ചെയ്യുന്നതോടെ കടകംപള്ളിയുടെ അറസ്റ്റ് ഉൾപ്പെടെയുള്ള കടുത്ത നടപടികളിലേക്ക് പോലീസ് കടന്നേക്കുമെന്നാണ് സൂചന.
