പത്തനംതിട്ട: ഭക്തിഗാനങ്ങൾ പാരഡിയായി ഇറക്കുന്നത് മതവികാരം വ്രണപ്പെടുത്തുന്നുവെന്ന സി.പി.എം പത്തനംതിട്ട ജില്ലാ സെക്രട്ടറി രാജു ഏബ്രഹാമിന്റെ പ്രസ്താവനയ്ക്കെതിരെ പ്രതിഷേധം ശക്തമാകുന്നു. വിശ്വാസത്തോടും ആചാരത്തോടും പാർട്ടി കാട്ടുന്ന ഇരട്ടത്താപ്പാണ് ഇതിലൂടെ പുറത്തുവരുന്നതെന്ന് രാഷ്ട്രീയ നിരീക്ഷകർ ചൂണ്ടിക്കാട്ടുന്നു.
2006-ലെ ‘സത്യപ്രതിജ്ഞാ’ ശാസന മറന്നോ?
ഇതേ രാജു ഏബ്രഹാം നിയമസഭാംഗമായിരുന്ന 2006-ലാണ് ദൈവനാമത്തിൽ സത്യപ്രതിജ്ഞ ചെയ്തതിന്റെ പേരിൽ എം.എം മോനായി, ഐഷാ പോറ്റി എന്നീ പാർട്ടി അംഗങ്ങളെ അന്നത്തെ സംസ്ഥാന സെക്രട്ടറി പിണറായി വിജയൻ പരസ്യമായി ശാസിച്ചത്. വൈരുദ്ധ്യാധിഷ്ഠിത ഭൗതികവാദത്തിൽ വിശ്വസിക്കുന്നവർ ദൈവനാമത്തിൽ സത്യപ്രതിജ്ഞ ചെയ്തത് പാർട്ടിയെ അപമാനിക്കലാണെന്നായിരുന്നു അന്ന് സംസ്ഥാന കമ്മിറ്റി വിലയിരുത്തിയത്. ഇവരെ രാഷ്ട്രീയമായി വേട്ടയാടുകയും സംഘടനാ രേഖയിൽ പ്രത്യേകമായി ഉൾപ്പെടുത്തി പാർട്ടിയിൽ ഒറ്റപ്പെടുത്തുകയും ചെയ്തു. പിൽക്കാലത്ത് എം.എം മോനായി രാഷ്ട്രീയമായി നിശബ്ദനാക്കപ്പെട്ടതും ഐഷാ പോറ്റി ഒതുക്കപ്പെട്ടതും വിശ്വാസത്തിന്റെ പേരിൽ പാർട്ടി നടത്തിയ ‘കൊല്ലാക്കൊല’യുടെ ഉദാഹരണമായി വിമർശകർ ചൂണ്ടിക്കാട്ടുന്നു.
പ്ലീനം രേഖയും നടപടികളും
2013-ലെ പാലക്കാട് പ്ലീനത്തിൽ, വിശ്വാസ-ആചാരങ്ങൾ പിന്തുടരുന്നത് പാർട്ടിക്കെതിരാണെന്ന് പ്രഖ്യാപിച്ചിരുന്നു. ഇതിന്റെ പേരിൽ മക്കളുടെ വിവാഹം പള്ളിയിലോ ക്ഷേത്രത്തിലോ നടത്തിയവർക്കും, ഗൃഹപ്രവേശത്തിന് ഗണപതി ഹോമം നടത്തിയവർക്കും എതിരെ പാർട്ടി നടപടി സ്വീകരിച്ചിട്ടുണ്ട്. ഈ നടപടികൾക്കൊന്നും മാപ്പുപറയാത്തവരാണ് ഇപ്പോൾ പാരഡി ഗാനത്തിന്റെ പേരിൽ മതവികാരം പ്രസംഗിക്കുന്നതെന്നാണ് പരിഹാസം.
പാരഡി ഭയത്തിന് പിന്നിൽ തിരഞ്ഞെടുപ്പ് തിരിച്ചടി?
തദ്ദേശ തിരഞ്ഞെടുപ്പ് കാലത്ത് ഹിറ്റായ ‘പോറ്റിയെ കേറ്റിയെ’ എന്ന പാരഡി ഗാനം വോട്ടർമാരെ സ്വാധീനിച്ചതും സി.പി.എമ്മിന് തിരിച്ചടിയായതുമാണ് ഇപ്പോഴത്തെ പെട്ടെന്നുള്ള മതസ്നേഹത്തിന് പിന്നിലെന്ന് കരുതപ്പെടുന്നു. പാരഡിക്കെതിരെ ഡി.ജി.പിക്ക് പരാതി നൽകിയ പ്രസാദ് കുഴിക്കാലയുടെ നീക്കത്തിന് പാർട്ടി പിന്തുണ നൽകുന്നതും ഇതേ രാഷ്ട്രീയ ലക്ഷ്യത്തോടെയാണ്.
സ്വർണ്ണക്കൊള്ളയും മൗനവും
ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട് മുൻ ദേവസ്വം ബോർഡ് പ്രസിഡന്റുമാരായ എ. പത്മകുമാർ, എൻ. വാസു എന്നിവർ ഒന്നര മാസമായി റിമാൻഡിലാണ്. എന്നാൽ ഇവർക്കെതിരെ യാതൊരു നടപടിയും പാർട്ടി സ്വീകരിച്ചിട്ടില്ല. അയ്യപ്പന്റെ സ്വർണ്ണം കവർന്നവരോട് മൃദുസമീപനം സ്വീകരിക്കുന്നവർ പാരഡി ഗാനത്തിന്റെ പേരിൽ മുതലക്കണ്ണീർ ഒഴുക്കുകയാണെന്ന് കോൺഗ്രസ് പരിഹസിച്ചു.
വിശ്വാസികളെ വേട്ടയാടുകയും അതേസമയം തന്നെ രാഷ്ട്രീയ ലാഭത്തിനായി വിശ്വാസത്തിന്റെ കാവൽക്കാരാകാൻ ശ്രമിക്കുകയും ചെയ്യുന്ന സി.പി.എമ്മിന്റെ ഈ ഇരട്ടത്താപ്പ് അണികൾക്കിടയിൽ തന്നെ വലിയ ചർച്ചകൾക്ക് വഴിവെച്ചിരിക്കുകയാണ്.
