തിരുവനന്തപുരം: ക്രിസ്മസ്-പുതുവത്സരത്തോടനുബന്ധിച്ച് മുഖ്യമന്ത്രി പിണറായി വിജയൻ പൗരപ്രമുഖർക്കായി യൂസഫലിയുടെ ഹയാത്ത് റീജൻസിയിൽ ഒരുക്കിയ വിരുന്നിൽ താരമായി മലയാളത്തിന്റെ അഭിമാന നടി ഭാവന. പ്രമുഖ ചലച്ചിത്ര പ്രവർത്തകയും സുഹൃത്തുമായ ഭാഗ്യലക്ഷ്മിയോടൊപ്പമാണ് നടി വിരുന്നിൽ പങ്കെടുത്തത്.
പരിപാടിക്ക് ശേഷം ബഹു. മുഖ്യമന്ത്രി, നടി ഭാവന എന്നിവർക്കൊപ്പമുള്ള ചിത്രം സഹിതം മന്ത്രി വി. ശിവൻകുട്ടി ഫേസ്ബുക്കിൽ കുറിച്ച പോസ്റ്റാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. “സർക്കാരിന്റെ ക്രിസ്മസ് വിരുന്നിൽ ബഹു. മുഖ്യമന്ത്രിയ്ക്കും മലയാളത്തിന്റെ അഭിമാനതാരം ഭാവനയ്ക്കും ഒപ്പം…” എന്നാണ് മന്ത്രി ചിത്രത്തോടൊപ്പം കുറിച്ചത്.
സാമൂഹിക, സാംസ്കാരിക, രാഷ്ട്രീയ രംഗത്തെ നിരവധി പ്രമുഖർ പങ്കെടുത്ത ചടങ്ങായിരുന്നു ഇത്. വെള്ളാപ്പള്ളി നടേശൻ ഉൾപ്പെടെയുള്ള പതിവ് ക്ഷണിതാക്കൾ വിരുന്നിനെത്തി. എന്നാൽ, പരിപാടിയിൽ പങ്കെടുത്ത മതമേലദ്ധ്യക്ഷൻമാരെ ഒഴിവാക്കി, ഭാവനയെ മാത്രം എടുത്തുപറഞ്ഞുള്ള മന്ത്രിയുടെ പോസ്റ്റാണ് ശ്രദ്ധേയമായത്. വിരുന്നിന്റെ മുഴുവൻ ചെലവും സർക്കാർ ഖജനാവിൽ നിന്നാണ് വഹിക്കുന്നത്.
