ന്യൂഡൽഹി: കോൺഗ്രസ് നേതാക്കളായ രാഹുൽ ഗാന്ധിയുടെയും പ്രിയങ്ക ഗാന്ധി വദ്രയുടെയും പ്രസംഗങ്ങളെ പരസ്പരം താരതമ്യം ചെയ്യുന്നത് ശരിയല്ലെന്ന് മുതിർന്ന കോൺഗ്രസ് നേതാവ് രേണുക ചൗധരി. ഇരുവരും ‘ആപ്പിളും ഓറഞ്ചും പോലെ’യാണെന്നും അവരെ താരതമ്യം ചെയ്യാനാവില്ലെന്നും അവർ എൻഡിടിവിയുമായുള്ള പ്രത്യേക അഭിമുഖത്തിൽ പറഞ്ഞു.
തുടർച്ചയായ ദിവസങ്ങളിൽ ലോക്‌സഭയിൽ നടന്ന ചർച്ചകളിലാണ് രാഹുലും പ്രിയങ്കയും സംസാരിച്ചത്. പ്രിയങ്കയുടെ പ്രസംഗം കൂടുതൽ ഫലപ്രദമായപ്പോൾ രാഹുൽ ഒരു അവസരം പാഴാക്കി എന്ന തരത്തിലുള്ള വിലയിരുത്തലുകൾക്കിടയിലാണ് രേണുക ചൗധരിയുടെ പ്രതികരണം.
”അവർ ആപ്പിളും ഓറഞ്ചും പോലെയാണ്, ഒരാളെ മറ്റൊരാളുമായി താരതമ്യം ചെയ്യാനാവില്ല. രാഹുലിന്റെ ശൈലി വ്യത്യസ്തമാണ്, അദ്ദേഹം സംസാരിച്ചത് മറ്റൊരു വിഷയത്തെക്കുറിച്ചാണ്. പ്രിയങ്കയും വളരെ മികച്ച രീതിയിൽ സംസാരിച്ചു,” ചൗധരി വ്യക്തമാക്കി. ഇരുവർക്കുമിടയിലെ താരതമ്യപ്പെടുത്തലുകളെ അവർ ‘സൈക്കോബാബിൾ’ എന്നും വിശേഷിപ്പിച്ചു.
ഓരോരുത്തരും വ്യത്യസ്തരാണ്, വ്യത്യസ്തമായ വിഷയങ്ങളെയാണ് അവർ അഭിസംബോധന ചെയ്തതെന്നും. അതിനാൽ അവരുടെ പ്രസംഗങ്ങളെ വിലയിരുത്തുമ്പോൾ ഈ കാര്യങ്ങൾ പരിഗണിക്കണമെന്നും രേണുക ചൗധരി കൂട്ടിച്ചേർത്തു. ഇരുവരും അവരവരുടെ നിലപാടിൽ ഉറച്ചുനിന്ന് പ്രധാനപ്പെട്ട കാര്യങ്ങൾ സഭയിൽ ഉന്നയിച്ചതായും അവർ പറഞ്ഞു.
