തിരുവനന്തപുരം: കേരളത്തിലെ തദ്ദേശ സ്വയംഭരണ തിരഞ്ഞെടുപ്പിന്റെ ആദ്യഘട്ട പോളിങ്ങിന് മണിക്കൂറുകൾ മാത്രം ശേഷിക്കെ, പരസ്യപ്രചാരണം ഇന്ന് (ഡിസംബർ 7) വൈകുന്നേരം 6 മണിക്ക് അവസാനിക്കും. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ഏഴ് ജില്ലകളിലാണ് ഡിസംബർ 9-ന് വോട്ടെടുപ്പ് നടക്കുന്നത്.
പ്രചാരണത്തിന്റെ അവസാന മണിക്കൂറുകളിൽ രാഷ്ട്രീയ പാർട്ടികൾ നടത്തുന്ന ‘കൊട്ടിക്കലാശം’ ഉൾപ്പെടെയുള്ള പരിപാടികൾ തികച്ചും സമാധാനപരമായിരിക്കണം എന്ന് സംസ്ഥാന തിരഞ്ഞെടുപ്പ് കമ്മീഷണർ എ. ഷാജഹാൻ കർശനമായി നിർദ്ദേശിച്ചു. ക്രമസമാധാന പ്രശ്നങ്ങളോ, പൊതുജനങ്ങൾക്ക് യാത്രാതടസ്സങ്ങളോ ഉണ്ടാകരുത്.
അവസാന നിമിഷത്തെ തർക്കങ്ങൾ, വെല്ലുവിളികൾ, ശബ്ദ നിയന്ത്രണമില്ലാത്ത അനൗൺസ്മെന്റുകൾ, പ്രചാരണ ഗാനങ്ങൾ ഉച്ചത്തിൽ വെച്ച് മത്സരിക്കുന്ന പ്രവണത എന്നിവ കമ്മീഷൻ കർശനമായി വിലക്കിയിട്ടുണ്ട്. ഇത് നിയന്ത്രിക്കുന്നതിന് ജില്ലാ കളക്ടർമാർക്കും പോലീസ് അധികൃതർക്കും കമ്മീഷണർ നിർദ്ദേശം നൽകി.
കമ്മീഷന്റെ നിർദ്ദേശം: “പരസ്യ പ്രചാരണത്തിന്റെ സമാപനത്തിലും മാതൃകാ പെരുമാറ്റ ചട്ടവും (Model Code of Conduct) ഹരിതച്ചട്ടവും (Green Protocol) സ്ഥാനാർത്ഥികളും രാഷ്ട്രീയ പാർട്ടികളും ഉറപ്പുവരുത്തണം.”
1951-ലെ ജനപ്രാതിനിധ്യ നിയമത്തിലെ സെക്ഷൻ 126(1) പ്രകാരം വോട്ടെടുപ്പ് അവസാനിക്കുന്നതിന് 48 മണിക്കൂർ മുമ്പ് പരസ്യ പ്രചാരണം അവസാനിപ്പിക്കണം. ഈ നിയമം തദ്ദേശ സ്വയംഭരണ പൊതുതിരഞ്ഞെടുപ്പിനും ബാധകമാണ്.
