ശബരിമല സ്വർണ്ണത്തട്ടിപ്പ്: പ്രൊഫഷണൽ ഭരണത്തിന് ‘ശബരി’ അതോറിറ്റി സ്ഥാപിക്കണമെന്ന് പ്രശാന്ത് ഐ എ എസ്

തിരുവനന്തപുരം: ശബരിമല ക്ഷേത്രത്തിലെ സ്വർണ്ണപ്പാളികളുമായി ബന്ധപ്പെട്ട വിവാദങ്ങളുടെയും ക്രമക്കേടുകളുടെയും പശ്ചാത്തലത്തിൽ, തിരുമല തിരുപ്പതി ദേവസ്ഥാനം (TTD), വൈഷ്ണോ ദേവി ക്ഷേത്രം എന്നിവയുടെ മാതൃകയിൽ ശബരിമലയ്ക്കായി ഒരു പ്രൊഫഷണൽ ഭരണസംവിധാനം കൊണ്ടുവരണമെന്ന് പ്രശാന്ത് ഐ എ എസ് .ട്രാവൻകൂർ ദേവസ്വം ബോർഡിന്റെ (TDB) നിലവിലെ ഭരണപരമായ പോരായ്മകളാണ് സ്വർണ്ണത്തട്ടിപ്പ് പോലുള്ള ഗുരുതരമായ വീഴ്ചകൾക്ക് കാരണമെന്നും, ക്ഷേത്രകാര്യങ്ങൾ കൈകാര്യം ചെയ്യുന്നതിനായി ‘ശബരി’ (SABARI) എന്ന പേരിൽ ഒരു പ്രത്യേക അതോറിറ്റി രൂപീകരിക്കണമെന്നുമാണ് നിർദ്ദേശം.

4.54 കിലോ സ്വർണ്ണം കാണാതായി; TDBക്കെതിരെ FIR

​2019-ൽ വിഗ്രഹങ്ങളിൽ പുതിയ സ്വർണ്ണപ്പാളികൾ പതിപ്പിച്ചതുമായി ബന്ധപ്പെട്ട് ഏകദേശം 4.54 കിലോ സ്വർണ്ണത്തിന്റെ കണക്കിൽ വ്യത്യാസം വന്ന സംഭവമാണ് നിലവിലെ വിവാദങ്ങൾക്ക് ആധാരം. ഹൈക്കോടതി നിയോഗിച്ച പ്രത്യേക അന്വേഷണ സംഘം (SIT) കേസുമായി ബന്ധപ്പെട്ട് അറസ്റ്റുകൾ രേഖപ്പെടുത്തുകയും, എൻഫോഴ്സ്മെന്റ് ഡയറക്ടറേറ്റ് (ED) അന്വേഷണം ഏറ്റെടുക്കുകയും ചെയ്തു. ഈ കേസിൽ ദേവസ്വം ബോർഡിനെ എട്ടാം പ്രതിയായി ചേർക്കുകയും 2019-ലെ TDB അംഗങ്ങളെ പ്രതിചേർക്കുകയും ഉദ്യോഗസ്ഥരെ സസ്പെൻഡ് ചെയ്യുകയും ചെയ്തിട്ടുണ്ട്. കോടിക്കണക്കിന് രൂപയുടെ പുരാവസ്തു കച്ചവട മാഫിയയും ഭക്തിപരമായ ചൂഷണം ചെയ്യുന്ന മാഫിയയും വർഷങ്ങളായി തകർത്താടിയതിന്റെ വിവരങ്ങളാണ് കോടതി ഇടപെട്ട് പുറത്ത് വന്നത്.

‘അമച്വർ’ സംവിധാനം:

​കോടിക്കണക്കിന് രൂപയുടെ വരുമാനവും ലക്ഷക്കണക്കിന് തീർത്ഥാടകരും എത്തുന്ന ശബരിമലയെ നിയന്ത്രിക്കുന്നത് ഒരു ‘അമച്വർ ഇംപ്രൊവൈസേഷൻ’ രീതിയിലാണെന്ന് റിപ്പോർട്ടുകൾ ചൂണ്ടിക്കാട്ടുന്നു. താൽക്കാലികമായി മാത്രം തുറക്കുന്ന ഒരു ‘ടൗൺഷിപ്പ്’ എന്നതിലുപരി, സീസണിൽ തീർത്ഥാടക പ്രവാഹമുള്ള ഒരു ‘പ്രളയമേഖല’യാണ് ശബരിമല.
​നിലവിൽ, 1248 ക്ഷേത്രങ്ങൾ ഭരിക്കുന്ന മൂന്നംഗ TDB ബോഡിയുടെ കീഴിലെ മറ്റൊരു ക്ഷേത്രം മാത്രമാണ് ശബരിമല.
​ദേവസ്വം ബോർഡിൽ ധനകാര്യം, ഓഡിറ്റ്, ക്രൗഡ് മാനേജ്‌മെന്റ്, ഇക്കോളജി, ഡിജിറ്റൽ സംവിധാനങ്ങൾ എന്നിവയിൽ പ്രാവീണ്യമുള്ള പൂർണ്ണസമയ വിദഗ്ദ്ധരുടെ അഭാവമുണ്ട്.
​പകരം രാഷ്ട്രീയപരമായ നോമിനേഷനുകളാണ് ഭരണതലത്തിൽ എത്തുന്നത്. താത്ക്കാലിക സീസണൽ പരിഹാരങ്ങൾ കൊണ്ട് ഇനിയും മുന്നോട്ട് പോകാനാവില്ല.

പരിഹാരം: SABARI അതോറിറ്റി

​നിലവിലെ ഭരണപരമായ പ്രതിസന്ധി മറികടക്കാൻ, പ്രൊഫഷണൽ സമീപനം അനിവാര്യമാണ്. തിരുമല തിരുപ്പതി ക്ഷേത്രത്തിലെ മുതിർന്ന IAS എക്സിക്യൂട്ടീവ് ഓഫീസറുടെ മാതൃകയിൽ ശബരിമലയിലും സ്ഥിരമായ ഭരണനിർവഹണം ഏർപ്പെടുത്തണം.
​ഇതിനായി, ‘ശബരിമല സൗകര്യങ്ങളും ജൈവവൈവിധ്യ മേഖലയും പ്രാദേശിക അതോറിറ്റി’ (Sabarimala Amenities and Biodiversity Area Regional Authority – SABARI) എന്ന പേരിൽ ഒരു പ്രത്യേക ബോർഡ് സ്ഥാപിക്കണമെന്നാണ് നിർദ്ദേശം.

പൂർണ്ണസമയമുള്ള IAS ചീഫ് എക്സിക്യൂട്ടീവ് ആയിരിക്കണം SABARIയുടെ തലപ്പത്ത്.
​പൊതുധനകാര്യം, ഓഡിറ്റ്, സിവിൽ എഞ്ചിനീയറിംഗ്, പൊതുജനാരോഗ്യം, ദുരന്ത-ക്രൗഡ് മാനേജ്‌മെന്റ്, ഇക്കോളജി തുടങ്ങിയ മേഖലകളിലെ വിദഗ്ദ്ധർ ബോർഡിൽ അംഗങ്ങളാകണം.
​ആചാരപരവും വിശ്വാസപരവുമായ കാര്യങ്ങൾ തന്ത്രിമാരിലും പരമ്പരാഗത ട്രസ്റ്റിമാരിലും നിലനിർത്തിക്കൊണ്ട്, ക്ഷേത്രത്തിന്റെ ഭൗതികമായ നടത്തിപ്പും സുരക്ഷാ കാര്യങ്ങളും SABARI കൈകാര്യം ചെയ്യണം.

സ്വർണ്ണം കാണാതായ സംഭവത്തിൽനിന്ന് ആരംഭിച്ച്, ശബരിമലയുടെ ഭരണത്തിൽ സ്ഥിരമായ വിശ്വാസം വീണ്ടെടുക്കാൻ ഈ പ്രൊഫഷണൽ സമീപനം അനിവാര്യമാണെന്നും, ഒരു ദേശീയ തീർത്ഥാടന കേന്ദ്രത്തിന് ആവശ്യമായ ‘മുതിർന്ന ഭരണനിർവഹണം’ ഇതാണെന്നും പ്രശാന്ത് പറയുന്നു.