ലോകമെമ്പാടുമുള്ള കെ-പോപ്പ് (K-Pop) ആരാധകർക്ക് ആവേശം പകർന്നുകൊണ്ട് പ്രിയ ബാന്റ് ബിടിഎസ് (BTS) തിരിച്ചുവരവിനൊരുങ്ങുന്നു. നീണ്ട നാല് വർഷത്തെ ഇടവേളയ്ക്ക് ശേഷമാണ് ബിടിഎസ് അംഗങ്ങൾ ഒന്നിക്കുന്നത്. 2026 മാർച്ച് 20-ന് ബാന്റ് വീണ്ടും സജീവമാകുമെന്ന് ബാന്റ് ഏജൻസിയായ ബിഗ്ഹിറ്റ് മ്യൂസിക് (Bighit Music) ഔദ്യോഗികമായി അറിയിച്ചു. സോഷ്യൽ മീഡിയയിലൂടെയായിരുന്നു ഈ സുപ്രധാന പ്രഖ്യാപനം.
തിരിച്ചുവരവ് സൈനിക സേവനത്തിന് ശേഷം
ദക്ഷിണ കൊറിയയിലെ നിർബന്ധിത സൈനിക സേവനത്തിന്റെ ഭാഗമായാണ് ബാന്റ് അംഗങ്ങൾ സംഗീത ലോകത്ത് നിന്ന് താൽക്കാലികമായി വിട്ടുനിന്നത്. ആർഎം, ജിൻ, സുഗ, ജെ-ഹോപ്പ്, ജിമിൻ, വി, ജങ്കൂക്ക് എന്നീ ഏഴ് അംഗങ്ങളും സൈനിക സേവനം പൂർത്തിയാക്കി മടങ്ങിയെത്തുന്നതോടെ ബിടിഎസ് പൂർണ്ണരൂപത്തിൽ വീണ്ടും വേദിയിലെത്തും. ജങ്കൂക്ക്, സുഗ, ആർഎം, ജിമിൻ എന്നിവർ 2025 ജൂണിലാണ് സൈന്യത്തിൽ നിന്ന് വിരമിച്ചത്. തൊട്ടുപിന്നാലെ ജെ-ഹോപ്പും ജിന്നും സേവനം പൂർത്തിയാക്കി പുറത്തിറങ്ങിയിരുന്നു.
പുതിയ ആൽബം മാർച്ച് 20-ന്
2022-ൽ പുറത്തിറങ്ങിയ ‘പ്രൂഫ്’ (Proof) എന്ന ആൽബത്തിന് ശേഷം ബിടിഎസിന്റേതായി ഗ്രൂപ്പ് ആൽബങ്ങളൊന്നും പുറത്തുവന്നിരുന്നില്ല. റിപ്പോർട്ടുകൾ പ്രകാരം, മാർച്ച് 20-ന് പുറത്തിറങ്ങുന്ന പുതിയ ആൽബത്തിലൂടെ ബാന്റ് വൻ തിരിച്ചുവരവാണ് ലക്ഷ്യമിടുന്നത്. ഇടവേള സമയത്ത് ബാന്റ് അംഗങ്ങൾ ഓരോരുത്തരും തനിച്ചുള്ള മ്യൂസിക് ആൽബങ്ങൾ പുറത്തിറക്കിയിരുന്നുവെങ്കിലും, ഏഴ് പേരും ഒന്നിച്ചുള്ള പ്രകടനം കാണാനാണ് ‘ആർമി’ (BTS ARMY) എന്ന് വിളിക്കപ്പെടുന്ന ആരാധകക്കൂട്ടം കാത്തിരിക്കുന്നത്.
2020 മുതൽ ആഗോളതലത്തിൽ വൻ സ്വാധീനം ചെലുത്തിയ ബാന്റാണ് ബിടിഎസ്. ‘ബട്ടർ’, ‘ഡൈനാമൈറ്റ്’, ‘സ്റ്റേ’, ‘ഫേക്ക് ലവ്’ തുടങ്ങിയ ഗാനങ്ങൾ ലോകചാർട്ടുകളിൽ ഒന്നാമതെത്തിയിരുന്നു. നാല് വർഷത്തെ കാത്തിരിപ്പിന് വിരാമമിട്ട് മാർച്ച് 20-ന് ബിടിഎസ് എത്തുമ്പോൾ സംഗീത ലോകം വലിയൊരു ആഘോഷത്തിനാകും സാക്ഷ്യം വഹിക്കുക.
