പുതുക്കാട്: പുതുക്കാട് ടൗൺ കേന്ദ്രീകരിച്ചും സമീപ പ്രദേശങ്ങളിലും ഡെങ്കിപ്പനി വ്യാപകമാകുന്ന പശ്ചാത്തലത്തിൽ പ്രതിരോധ നടപടികൾ ഊർജ്ജിതമാക്കി ഗ്രാമപഞ്ചായത്ത്. രോഗവ്യാപനം നിയന്ത്രണവിധേയമാക്കാൻ ആരോഗ്യവകുപ്പ് അടിയന്തര നടപടികൾ സ്വീകരിക്കണമെന്ന് ഗ്രാമപഞ്ചായത്ത് വൈസ് പ്രസിഡന്റ് കെ.ജെ. ജോജു ആവശ്യപ്പെട്ടു.
രോഗത്തിന്റെ ഉറവിടം കണ്ടെത്തി നശിപ്പിക്കുന്നതിനായി ആരോഗ്യ മേഖലയിലെ വിദഗ്ധരടങ്ങുന്ന പ്രത്യേക സംഘത്തെ നിയോഗിക്കണമെന്ന് ആവശ്യപ്പെട്ട് ആരോഗ്യവകുപ്പ് മന്ത്രി, ജില്ലാ കളക്ടർ, ജില്ലാ മെഡിക്കൽ ഓഫീസർ എന്നിവർക്ക് പഞ്ചായത്ത് കത്ത് നൽകിയിട്ടുണ്ട്. ജനങ്ങളുടെ ആശങ്ക പരിഹരിക്കാനും രോഗം പടരുന്നത് തടയാനും അധികൃതർക്ക് ബാധ്യതയുണ്ടെന്ന് പത്രക്കുറിപ്പിൽ പറയുന്നു.
അടിയന്തര യോഗം നാളെ
ഡെങ്കിപ്പനി പ്രതിരോധ നടപടികൾ ചർച്ച ചെയ്യുന്നതിനായി പഞ്ചായത്ത് ഭരണസമിതിയുടെ അടിയന്തര യോഗം ഡിസംബർ 31 ബുധനാഴ്ച രാവിലെ 9.30-ന് പഞ്ചായത്ത് ഓഫീസ് ഹാളിൽ ചേരും. പഞ്ചായത്ത് പ്രസിഡന്റ് രതി ബാബുവിന്റെ അധ്യക്ഷതയിൽ ചേരുന്ന യോഗത്തിൽ ആരോഗ്യപ്രവർത്തകർ, ഉദ്യോഗസ്ഥർ, സാമൂഹ്യ-സംഘടനാ പ്രവർത്തകർ എന്നിവർ പങ്കെടുക്കും.
