കേരള ബാങ്ക് : 7മാസമായിട്ടുംഅഡ്വൈസ് മെമ്മോ കിട്ടിയ 409 പേർക്ക് നിയമനമില്ല! സഖാക്കൾക്ക് വേണ്ടി ഉദ്യോഗാർത്ഥികളെ വട്ടം കറക്കി വാസവൻ ; “നടത്തി തരാം” ജഗതി ഡയലോഗുമായി വാസവൻ

തിരുവനന്തപുരം: കേരള ബാങ്കിലെ ക്ലർക്ക്/കാഷ്യർ തസ്തികയിലേക്ക് പിഎസ്‌സി വഴി നിയമന ശുപാർശ ലഭിച്ച 409 ഉദ്യോഗാർത്ഥികൾ ഏഴുമാസമായി തെരുവിൽ. അർഹതപ്പെട്ട ജോലിക്ക് വേണ്ടി വകുപ്പ് മന്ത്രി വി.എൻ. വാസവൻ്റെ പടിക്കൽ മുട്ടാത്ത ഉദ്യോഗാർത്ഥികൾ ഇന്നില്ല. എന്നാൽ “നടത്തിത്തരാം” എന്ന സ്ഥിരം പല്ലവിക്കപ്പുറം നിയമന ഉത്തരവ് മാത്രം ഇപ്പോഴും കിട്ടാക്കനിയായി തുടരുകയാണ്.

​പിന്നിൽ ‘സഖാക്കളെ’ സംരക്ഷിക്കാനുള്ള നീക്കം?

​ബാങ്കിൽ നിലവിൽ താൽക്കാലിക അടിസ്ഥാനത്തിൽ ജോലി ചെയ്യുന്ന പാർട്ടി അനുഭാവികളെ സംരക്ഷിക്കാനാണ് മന്ത്രി ഈ ഒളിച്ചുകളി നടത്തുന്നതെന്നാണ് പ്രധാന ആക്ഷേപം. പിഎസ്‌സി വഴി നിയമനം നടന്നാൽ നിലവിലുള്ള താൽക്കാലിക ജീവനക്കാർക്ക് പടിയിറങ്ങേണ്ടി വരും. ഇത് ഒഴിവാക്കാനായി നിയമന ഉത്തരവ് ബോധപൂർവം വൈകിപ്പിക്കുകയാണെന്ന് ഉദ്യോഗാർത്ഥികൾ ആരോപിക്കുന്നു.

​ഈ ഫെബ്രുവരിയിൽ താൽക്കാലികക്കാർക്ക് ആറുമാസം കൂടി ജോലി നീട്ടി നൽകിക്കൊണ്ട് സർക്കാർ ഉത്തരവിറക്കി. “അഡ്വൈസ് ലഭിച്ചവർക്ക് നിയമനം ലഭിക്കുന്നത് വരെ” എന്ന നിബന്ധനയോടെയാണ് ഈ കാലാവധി നീട്ടൽ. നിയമനം നൽകേണ്ട മന്ത്രി തന്നെ അത് വൈകിപ്പിക്കുകയും, പകരം താൽക്കാലികക്കാരുടെ കാലാവധി നീട്ടുകയും ചെയ്യുന്നത് ഉദ്യോഗാർത്ഥികളോടുള്ള വെല്ലുവിളിയാണെന്ന് ആക്ഷേപമുയരുന്നുണ്ട്.

​നിയമന പ്രക്രിയയുടെ നാൾവഴി

​2024 ഏപ്രിലിൽ വിജ്ഞാപനം വന്നത് മുതൽ ഇന്നുവരെയുള്ള ഉദ്യോഗാർത്ഥികളുടെ കാത്തിരിപ്പ് ഇങ്ങനെ:

“നടത്തിത്തരാം” എന്ന ജഗതി സ്റ്റൈൽ മറുപടി

​തങ്ങളുടെ ജീവിതം വഴിമുട്ടി നിൽക്കുമ്പോഴും അധികാരികളിൽ നിന്ന് ലഭിക്കുന്നത് പരിഹാസ്യമായ മറുപടികളാണെന്ന് ഉദ്യോഗാർത്ഥികൾ പറയുന്നു. ഒരു പഴയ സിനിമയിൽ ജഗതി ശ്രീകുമാർ അവതരിപ്പിച്ച കഥാപാത്രത്തിൻ്റെ ശൈലിയിൽ “എല്ലാം ശരിയാക്കാം, നടത്തിത്തരാം” എന്ന് മന്ത്രി വാഗ്ദാനം നൽകുന്നുണ്ടെങ്കിലും ഫലത്തിൽ ഒന്നുമുണ്ടാകുന്നില്ല.

​ഓഫീസുകൾ തോറും കയറിയിറങ്ങി ഉദ്യോഗാർത്ഥികൾ തളർന്നിരിക്കുകയാണ്. അർഹതപ്പെട്ട ജോലിക്ക് വേണ്ടി ഭരണസിരാകേന്ദ്രങ്ങളിൽ അലയേണ്ടി വരുന്ന യുവതലമുറയുടെ ഗതികേടിൽ വ്യാപക പ്രതിഷേധമാണ് ഉയരുന്നത്.