കൊച്ചി: മലയാള സിനിമയിലെ മെഗാസ്റ്റാർ മമ്മൂട്ടിയും ലേഡി സൂപ്പർസ്റ്റാർ നയൻതാരയും പത്ത് വർഷത്തെ ഇടവേളയ്ക്ക് ശേഷം വീണ്ടും വെള്ളിത്തിരയിൽ ഒന്നിക്കുന്നു. പ്രശസ്ത സംവിധായകൻ അടൂർ ഗോപാലകൃഷ്ണൻ ഒരുക്കുന്ന പുതിയ ചിത്രത്തിലൂടെയാണ് ഈ ഹിറ്റ് ജോഡികൾ വീണ്ടും പ്രേക്ഷകർക്ക് മുന്നിലെത്തുന്നത്.
2016-ൽ പുറത്തിറങ്ങിയ ‘പുതിയ നിയമം’ എന്ന ചിത്രത്തിലാണ് ഇരുവരും അവസാനമായി ഒന്നിച്ചു അഭിനയിച്ചത്. അതിനുമുമ്പ് ‘ഭാസ്കർ ദ റാസ്കൽ’, ‘രാപ്പകൽ’, ‘തസ്കരവീരൻ’ തുടങ്ങി നിരവധി ചിത്രങ്ങളിൽ ഈ കൂട്ടുകെട്ട് തിളങ്ങിയിട്ടുണ്ട്. ഇപ്പോൾ ലോകപ്രശസ്ത സംവിധായകൻ അടൂർ ഗോപാലകൃഷ്ണന്റെ ചിത്രത്തിലൂടെ ഇരുവരും മടങ്ങിവരുന്നത് സിനിമാ ലോകത്ത് വലിയ ചർച്ചയായിരിക്കുകയാണ്.
കലാമൂല്യമുള്ള സിനിമകൾക്ക് അന്താരാഷ്ട്ര തലത്തിൽ ശ്രദ്ധേയനായ അടൂർ ഗോപാലകൃഷ്ണൻ, മമ്മൂട്ടിയെ നായകനാക്കി നേരത്തെ ‘അനന്തരം’, ‘മതിലുകൾ’, ‘വിധേയൻ’ എന്നീ ക്ലാസിക് ചിത്രങ്ങൾ ഒരുക്കിയിട്ടുണ്ട്. നീണ്ട ഇടവേളയ്ക്ക് ശേഷം അടൂർ ഗോപാലകൃഷ്ണൻ സംവിധാന തൊപ്പി അണിയുമ്പോൾ അത് മമ്മൂട്ടിക്കും നയൻതാരയ്ക്കും ഒപ്പമാകുന്നത് സിനിമാ പ്രേമികളിൽ വലിയ ആവേശം സൃഷ്ടിച്ചിരിക്കുകയാണ്.
ചിത്രത്തെക്കുറിച്ചുള്ള ഔദ്യോഗിക പ്രഖ്യാപനം ഉടൻ ഉണ്ടാകും. മമ്മൂട്ടി കമ്പനിയാണോ അതോ മറ്റേതെങ്കിലും പ്രൊഡക്ഷൻ ഹൗസ് ആണോ ചിത്രം നിർമ്മിക്കുന്നത് എന്ന കാര്യത്തിൽ വ്യക്തത വരാനുണ്ട്. നയൻതാരയുടെ മലയാളത്തിലേക്കുള്ള ശക്തമായ തിരിച്ചുവരവ് കൂടിയായിരിക്കും ഈ പ്രോജക്റ്റ്.
