അഹമ്മദാബാദ്: വിഴിഞ്ഞത്തെ കടലിരമ്പത്തിന്റെ കരുത്തുമായി വന്നവൻ അഹമ്മദാബാദിലെ നരേന്ദ്ര മോദി സ്റ്റേഡിയത്തെ ചുഴറ്റിയെറിഞ്ഞു! ടി20 ലോകകപ്പ് ഫൈനലിൽ ന്യൂസിലൻഡ് ബൗളർമാരെ വെറും കാഴ്ചക്കാരാക്കി സഞ്ജു സാംസൺ നടത്തിയ ബാറ്റിംഗ് വെടിക്കെട്ട് വെറുമൊരു പ്രകടനമല്ല, അതൊരു യുദ്ധമായിരുന്നു. 46 പന്തിൽ 89 റൺസുമായി സഞ്ജു ആറാടിയപ്പോൾ ഇന്ത്യ കുറിച്ചത് 255 റൺസെന്ന ഹിമാലയൻ സ്കോർ!
സച്ചിന് ശേഷം ഇതാ ഒരു പോരാളി!
ക്രിക്കറ്റ് ദൈവം സച്ചിൻ ടെണ്ടുൽക്കർക്ക് ശേഷം തന്റെ വ്യക്തിഗത നേട്ടങ്ങൾക്കപ്പുറം ഇന്ത്യയുടെ വിജയത്തിനായി നെഞ്ചുവിരിച്ചു പോരാടുന്ന ഒരേയൊരു താരം അത് സഞ്ജു സാംസൺ മാത്രമാണെന്ന് അഹമ്മദാബാദിലെ ഗാലറി ഇന്ന് അടിവരയിട്ടു. സ്വാർത്ഥതയില്ലാത്ത ബാറ്റിംഗ്, ടീമിനായി എരിഞ്ഞുതീരാനുള്ള സന്നദ്ധത- സഞ്ജു ഇന്ന് ഇന്ത്യയുടെ വികാരമായി മാറുകയായിരുന്നു.
ലോക്കി ഫെർഗൂസനെ ‘കശാപ്പ്’ ചെയ്തു!
മാറ്റ് ഹെൻറിയെ സിക്സറിന് പറത്തിക്കൊണ്ട് തുടങ്ങിയ സഞ്ജു പിന്നീട് ക്രീസിൽ വിശ്വരൂപം പൂണ്ടു. ലോകത്തെ ഏറ്റവും വേഗതയേറിയ ബൗളർമാരിൽ ഒരാളായ ലോക്കി ഫെർഗൂസനെ സൈറ്റ് സ്ക്രീനിന് മുകളിലൂടെ പറത്തിയ സിക്സർ കാണാൻ തന്നെ ഒരു പ്രത്യേക ചന്തമായിരുന്നു. രചിൻ രവീന്ദ്രയുടെ പന്തുകളെ ശാന്തിഗ്രാം ഗോൾഫ് കോഴ്സിലെ പുല്ലുചെത്തുന്ന ലാഘവത്തോടെയാണ് സഞ്ജു ഗാലറിയിലെത്തിച്ചത്.
- സംഹാരവീര്യം: വെറും 33 പന്തിൽ അർധസെഞ്ചുറി!
- തുടർച്ചയായ പ്രഹരം: ലോകകപ്പിൽ തുടർച്ചയായി മൂന്ന് ഇന്നിങ്സുകളിൽ 80+ സ്കോർ ചെയ്യുന്ന ചരിത്ര നേട്ടം.
പടുകൂറ്റൻ സ്കോർ, കിവികൾ വിറയ്ക്കുന്നു
അഭിഷേക് ശർമയും ഇഷാൻ കിഷനും തകർത്തടിച്ചെങ്കിലും സഞ്ജു എന്ന പോരാളിയായിരുന്നു ഇന്ത്യൻ ഇന്നിംഗ്സിന്റെ നട്ടെല്ല്. 16-ാം ഓവറിൽ ജെയിംസ് നീഷാമിന്റെ പന്തിൽ പുറത്താകുമ്പോൾ സഞ്ജുവിന്റെ ബാറ്റിന് തീപിടിച്ചിരുന്നു. 8 കൂറ്റൻ സിക്സറുകളും 5 ഫോറുകളുമടങ്ങിയ ആ ഇന്നിംഗ്സ് കണ്ടുനിന്നവർക്ക് അതൊരു വിരുന്നായിരുന്നു. ഒടുവിൽ ശിവം ദുബെ കൂടി ആഞ്ഞടിച്ചതോടെ ഇന്ത്യ 5 വിക്കറ്റിന് 255 എന്ന റെക്കോർഡ് സ്കോറിലെത്തി.
ഇനി പന്ത് ബൗളർമാരുടെ കയ്യിലാണ്. സഞ്ജു പടുത്തുയർത്തിയ ഈ റൺമലയ്ക്ക് മുന്നിൽ കിവികൾ തകർന്നടിയുമെന്ന് ഉറപ്പാണ്. വിഴിഞ്ഞത്തിന്റെ മണ്ണ് നൽകിയ ആത്മധൈര്യത്തിന് മുന്നിൽ ഇനി ആർക്കും പിടിച്ചുനിൽക്കാനാവില്ല!
