പയ്യന്നൂർ: പയ്യന്നൂർ കോളേജ് മലയാള വിഭാഗം മുൻ മേധാവി ഡോ. കെ.പി. മാലതി രചിച്ച ‘ഋതം വദിഷ്യാമി’ എന്ന പുസ്തകത്തിന്റെ പ്രകാശന കർമ്മം ഫെബ്രുവരി 8-ന് ഞായറാഴ്ച നടക്കും. സഞ്ജയൻ സ്മാരക ഗ്രന്ഥാലയത്തിന്റെ (ശാന്തിഗ്രാം, അന്നൂർ) ആഭിമുഖ്യത്തിൽ അന്നൂർ കേളപ്പജി സ്മാരക വില്ലേജ് ഹാളിൽ വെച്ച് വൈകുന്നേരം 4:30-നാണ് ചടങ്ങ് സംഘടിപ്പിച്ചിരിക്കുന്നത്.
പ്രതിപക്ഷ നേതാവ് വി.ഡി. സതീശൻ പുസ്തക പ്രകാശനം നിർവ്വഹിക്കും. ചടങ്ങിൽ എൻ. പ്രശാന്ത് IAS പുസ്തകം ഏറ്റുവാങ്ങും. ഡോ. എം.കെ. മുനീർ എം.എൽ.എ പുസ്തക പരിചയം നടത്തും.
കെ. രാമചന്ദ്രന്റെ അധ്യക്ഷതയിൽ നടക്കുന്ന ചടങ്ങിൽ സി.വി. വിനോദ് കുമാർ സ്വാഗതം ആശംസിക്കും. അമ്മ (AMMA) വൈസ് പ്രസിഡന്റ് ജയൻ ചേർത്തല ചടങ്ങിൽ ആശംസകൾ നേരും. പുസ്തക രചനയുമായി ബന്ധപ്പെട്ട തന്റെ അനുഭവങ്ങൾ ഡോ. കെ.പി. മാലതി ചടങ്ങിൽ പങ്കുവെക്കും. സി.കെ. ഹരീന്ദ്രൻ നന്ദി രേഖപ്പെടുത്തും.
പയ്യന്നൂർ കോളേജ് മലയാള വിഭാഗം മേധാവിയായും ഗ്രന്ഥാലയ പ്രവർത്തക സമിതി അംഗമായും ദീർഘകാലം സേവനമനുഷ്ഠിച്ച ഡോ. കെ.പി. മാലതിയുടെ പുതിയ കൃതിയുടെ പുസ്തക പ്രകാശന ചടങ്ങിലേക്ക് മുഴുവൻ കലാ-സാഹിത്യ പ്രേമികളെയും സ്വാഗതം ചെയ്യുന്നതായി സഞ്ജയൻ സ്മാരക ഗ്രന്ഥാലയം സെക്രട്ടറി അറിയിച്ചു.
