തിരുവനന്തപുരം: ശാരീരിക വെല്ലുവിളികൾ നേരിടുന്നവർക്കും മുതിർന്ന പൗരന്മാർക്കും സുരക്ഷിതവും സുഗമവുമായ യാത്രാനുഭവം ഉറപ്പാക്കുന്ന ‘ഇൻക്ലൂസീവ് ആൻഡ് ആക്സസിബിൾ ടൂറിസം’ (Inclusive and Accessible Tourism) പദ്ധതിക്ക് കരുത്തുപകരാൻ ‘കേരള ഫോർ ഓൾ’ (Kerala for All) കോൺക്ലേവ് വരുന്നു. ജനുവരി 31, ഫെബ്രുവരി 1 തീയതികളിൽ കൊച്ചിയിലെ ഗ്രാൻഡ് ഹയാത്ത് ഹോട്ടലിലാണ് ഈ വിപുലമായ സംഗമം നടക്കുന്നത്.
രണ്ട് കോടി രൂപയുടെ സർക്കാർ ധനസഹായം
പ്രശസ്ത മാധ്യമ സ്ഥാപനമായ ‘ദ ഹിന്ദു’ (The Hindu) വിന്റെ നേതൃത്വത്തിൽ, കേരള ടൂറിസം വകുപ്പിന്റെ സഹകരണത്തോടെയാണ് പരിപാടി സംഘടിപ്പിക്കുന്നത്. ഈ സംരംഭത്തിനായി 2,00,00,000 രൂപ (രണ്ട് കോടി രൂപ) + ജി.എസ്.ടി ടൂറിസം വകുപ്പ് മന്ത്രി പി.എ. മുഹമ്മദ് റിയാസ് അനുവദിച്ചു. ഇതുസംബന്ധിച്ച ഔദ്യോഗിക ഉത്തരവ് സർക്കാർ പുറത്തിറക്കി.
ദ ഹിന്ദു ഗ്രൂപ്പിന്റെ അപേക്ഷ പരിഗണിച്ച് ടൂറിസം ഡയറക്ടർ നൽകിയ ശുപാർശയുടെ അടിസ്ഥാനത്തിലാണ് മന്ത്രി തുക അനുവദിച്ചത്. പരിപാടി കഴിഞ്ഞ് മൂന്ന് മാസത്തിനകം തുക വിനിയോഗിച്ചതിന്റെ സർട്ടിഫിക്കറ്റ് ഹാജരാക്കണമെന്നും സർക്കാർ ഉത്തരവിൽ നിർദ്ദേശിച്ചിട്ടുണ്ട്.
