കൊച്ചി: ശബരിമല സ്വർണ്ണക്കവർച്ചാ കേസുമായി ബന്ധപ്പെട്ട് അന്വേഷണം പുതിയ തലത്തിലേക്ക്. കേസിൽ പ്രത്യേക അന്വേഷണ സംഘം (SIT) സമർപ്പിച്ച അന്വേഷണ പുരോഗതി റിപ്പോർട്ട് പരിശോധിച്ച ഹൈക്കോടതി, അഞ്ച് പേർ കൂടി നിലവിൽ അന്വേഷണ പരിധിയിലുണ്ടെന്ന നിർണ്ണായക വിവരം പുറത്തുവിട്ടു.
രണ്ട് ഘട്ടങ്ങളിലായി നടന്ന കവർച്ചകളിൽ ആദ്യ കേസിൽ മൂന്ന് പേരും, രണ്ടാമത്തെ കേസിൽ രണ്ട് പേരുമാണ് അന്വേഷണ സംഘത്തിന്റെ നിരീക്ഷണത്തിലുള്ളത്. നിലവിൽ ഈ അഞ്ച് പേരെയും പ്രതിപ്പട്ടികയിൽ ഉൾപ്പെടുത്തിയിട്ടില്ലെങ്കിലും, ഇവർക്കെതിരെ ശക്തമായ തെളിവുകൾ ശേഖരിക്കാനുള്ള ശ്രമത്തിലാണ് എസ്.ഐ.ടി.
ഹൈക്കോടതിയുടെ നിരീക്ഷണങ്ങൾ
സീൽ ചെയ്ത കവറിൽ എസ്.ഐ.ടി സമർപ്പിച്ച റിപ്പോർട്ട് വിശദമായി പരിശോധിച്ച ശേഷമാണ് ഹൈക്കോടതി പരാമർശം നടത്തിയത്. റിപ്പോർട്ടിൽ ഈ അഞ്ച് വ്യക്തികളുടെയും പേരുകൾ കൃത്യമായി പരാമർശിച്ചിട്ടുണ്ടെന്നാണ് സൂചന.
”അന്വേഷണത്തിന്റെ ഈ ഘട്ടത്തിൽ പേരുകൾ വെളിപ്പെടുത്തുന്നത് ഉചിതമല്ലെങ്കിലും, അഞ്ച് പേർ കൃത്യമായ നിരീക്ഷണത്തിലാണെന്ന് റിപ്പോർട്ടിൽ നിന്നും വ്യക്തമാണ്.” – കോടതി നിരീക്ഷിച്ചു.
ആരാകും ഈ അഞ്ച് പേർ?
സി.പി.എമ്മിന്റെ മൂന്ന് പ്രമുഖ നേതാക്കൾ നിലവിൽ ഈ കേസിൽ പ്രതികളായി ജയിലിൽ കഴിയുന്ന സാഹചര്യത്തിൽ, പുതിയ അഞ്ച് പേർ ആരെല്ലാമായിരിക്കും എന്നതിനെക്കുറിച്ച് രാഷ്ട്രീയ വൃത്തങ്ങളിലും പൊതുസമൂഹത്തിലും വലിയ ചർച്ചകൾ ഉയർന്നു കഴിഞ്ഞു. പുതിയ അഞ്ച് പേരും ഭരണപക്ഷവുമായി അടുത്ത ബന്ധം പുലർത്തുന്നവരാണെന്നാണ് ലഭിക്കുന്ന സൂചന.
