മലപ്പുറം: ചികിത്സ കഴിഞ്ഞ് ഡിസ്ചാർജ് ചെയ്ത രോഗിയെ ബില്ല് അടക്കുന്നതുവരെ ആശുപത്രിയിൽ തടഞ്ഞുവെക്കാനാവില്ലെന്ന് ജില്ലാ ഉപഭോക്തൃ കമ്മീഷന്റെ സുപ്രധാന വിധി. ആശുപത്രി ബില്ലിന്റെ പേരിൽ രോഗിയെ വിട്ടയക്കാതിരുന്നത് സേവനത്തിലെ വീഴ്ചയാണെന്ന് കണ്ടെത്തിയ കമ്മീഷൻ, പരാതിക്കാരന് 30,000 രൂപ നഷ്ടപരിഹാരം നൽകാൻ സ്റ്റാർ ഹെൽത്ത് ഇൻഷുറൻസ് കമ്പനിക്കും സ്വകാര്യ ആശുപത്രിയ്ക്കും ഉത്തരവിട്ടു.
സംഭവത്തിന്റെ പശ്ചാത്തലം ചുങ്കത്തറ സ്വദേശി നൽകിയ പരാതിയിലാണ് ജില്ലാ ഉപഭോക്തൃ കമ്മീഷന്റെ നടപടി. 2015 മുതൽ സ്റ്റാർ ഹെൽത്ത് ഇൻഷുറൻസ് പോളിസിയുള്ള പരാതിക്കാരൻ, ശ്വാസതടസ്സം അനുഭവപ്പെട്ട മകനെ 2024 സെപ്റ്റംബറിൽ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. സർജറിക്ക് ശേഷം സെപ്റ്റംബർ 19-ന് ഡിസ്ചാർജ് നിശ്ചയിച്ചെങ്കിലും ഇൻഷുറൻസ് തുക പൂർണ്ണമായി അനുവദിക്കുന്നതിൽ കമ്പനി കാലതാമസം വരുത്തി.
66,500 രൂപയുടെ ബില്ലിൽ കേവലം 41,800 രൂപ മാത്രമാണ് ഇൻഷുറൻസ് ആദ്യം അനുവദിച്ചത്. ബാക്കി തുക ലഭിക്കാത്തതിനാൽ പരാതിക്കാരനും മകനും വൈകുന്നേരം വരെ ആശുപത്രിയിൽ തുടരേണ്ടി വന്നു. ഒടുവിൽ ബന്ധുക്കളിൽ നിന്നും പണം കടം വാങ്ങി ബില്ലടച്ച ശേഷമാണ് ഇവർക്ക് ആശുപത്രി വിടാനായത്.
കമ്മീഷന്റെ നിരീക്ഷണം ആശുപത്രി രേഖകളിൽ അഡ്മിഷൻ, ഡിസ്ചാർജ് സമയങ്ങൾ കൃത്യമായി രേഖപ്പെടുത്താൻ മാനേജ്മെന്റിന് ബാധ്യതയുണ്ടെന്ന് കമ്മീഷൻ വ്യക്തമാക്കി.
"രോഗിയെ ചികിത്സയ്ക്ക് ശേഷം ഡിസ്ചാർജ് ചെയ്യുന്നതും ആശുപത്രി ബില്ല് അടക്കുന്നതും രണ്ട് നടപടികളാണ്. ബില്ല് അടക്കാത്തതിന്റെ പേരിൽ രോഗിയെ തടയുന്നത് നിയമവിരുദ്ധമാണ്." - കമ്മീഷൻ നിരീക്ഷിച്ചു.ശിക്ഷാവിധി ഇൻഷുറൻസ് കമ്പനിയുടെയും ആശുപത്രിയുടെയും ഭാഗത്തുനിന്നുണ്ടായ വീഴ്ചയ്ക്ക് നഷ്ടപരിഹാരമായി 25,000 രൂപയും കോടതി ചെലവായി 5,000 രൂപയും ഉൾപ്പെടെ 30,000 രൂപ നൽകാനാണ് വിധി. കൂടാതെ ചികിത്സയ്ക്ക് ചെലവായ മുഴുവൻ തുകയും പരാതിക്കാരന് നൽകണം. 45 ദിവസത്തിനകം വിധി നടപ്പിലാക്കിയില്ലെങ്കിൽ ഒൻപത് ശതമാനം പലിശ സഹിതം തുക നൽകേണ്ടി വരും.
കെ. മോഹൻദാസ് പ്രസിഡന്റും പ്രീതി ശിവരാമൻ, സി.വി. മുഹമ്മദ് ഇസ്മായിൽ എന്നിവർ അംഗങ്ങളുമായ കമ്മീഷനാണ് ഈ നിർണ്ണായക വിധി പുറപ്പെടുവിച്ചത്.
