സിഡ്നി: മലയാളത്തിന്റെ എവർഗ്രീൻ നായിക നദിയ മൊയ്തുവും ഹോളിവുഡ് സൂപ്പർ താരം നിക്കോൾ കിഡ്മാനും ഒന്നിച്ചുള്ള ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. ഓസ്ട്രേലിയയിൽ വെച്ചാണ് ഇരുവരും കണ്ടുമുട്ടിയത്.
തന്നേക്കാൾ ഉയരക്കൂടുതലുള്ള നിക്കോൾ കിഡ്മാൻ, നദിയയ്ക്കൊപ്പം ഫോട്ടോയ്ക്ക് പോസ് ചെയ്യാനായി അല്പം കുനിഞ്ഞു നിൽക്കുന്ന ദൃശ്യങ്ങൾ ആരാധകരുടെ മനസ്സ് കീഴടക്കുകയാണ്. ഹോളിവുഡ് താരത്തിന്റെ വിനയത്തെയും ലാളിത്യത്തെയും പുകഴ്ത്തി നിരവധി പേരാണ് രംഗത്തെത്തിയിരിക്കുന്നത്.
തന്റെ ഇൻസ്റ്റാഗ്രാം പേജിലൂടെ നദിയ തന്നെയാണ് ഈ സന്തോഷനിമിഷം ആരാധകർക്കായി പങ്കുവെച്ചത്. “ഐക്കോണിക് നിക്കോൾ കിഡ്മാനെ കണ്ടുമുട്ടിയപ്പോൾ” എന്ന അടിക്കുറിപ്പോടെയാണ് താരം വീഡിയോ പോസ്റ്റ് ചെയ്തത്. ഓസ്ട്രേലിയയിൽ അവധി ആഘോഷിക്കുകയാണ് താരം ഇപ്പോൾ. മലയാള സിനിമയിലെ ‘സ്റ്റൈൽ ഐക്കൺ’ എന്ന് വിശേഷിപ്പിക്കപ്പെടുന്ന നദിയയും ലോക സിനിമയിലെ ഇതിഹാസ താരം നിക്കോളും ഒരു ഫ്രെയിമിൽ വന്നത് സിനിമാ പ്രേമികളെ ആവേശത്തിലാക്കിയിരിക്കുകയാണ്.
