ചണ്ഡീഗഡ്: ദക്ഷിണാഫ്രിക്കക്കെതിരെ മുള്ളൻപൂരിൽ നടന്ന രണ്ടാം ടി20 മത്സരത്തിൽ ഇന്ത്യ 51 റൺസിന് ദയനീയമായി പരാജയപ്പെട്ടതോടെ ടീമിനുള്ളിൽ ആശങ്കയുടെ കരിനിഴൽ വീഴുന്നു. ഇതോടെ അഞ്ച് മത്സരങ്ങളുള്ള പരമ്പര 1-1 എന്ന നിലയിൽ സമനിലയിലായി. ബാറ്റിങ്ങിലെ പ്രമുഖ താരങ്ങളായ ശുഭ്മാൻ ഗിൽ, സൂര്യകുമാർ യാദവ് എന്നിവരുടെ മോശം ഫോമും ബൗളിംഗ് നിരയുടെ അച്ചടക്കമില്ലായ്മയുമാണ് തോൽവിക്ക് പ്രധാന കാരണം.
ഇന്ത്യൻ ക്രിക്കറ്റിലെ ഈ അവസ്ഥയിൽ പരിശീലകൻ ഗൗതം ഗംഭീറും ടീം മാനേജ്‌മെന്റും ഉത്തരം പറയേണ്ട സാഹചര്യമാണ് ഉടലെടുത്തിരിക്കുന്നത്. മുൻ ഇന്ത്യൻ ഓൾറൗണ്ടർ ഇർഫാൻ പഠാൻ ഉൾപ്പെടെയുള്ളവർ സോഷ്യൽ മീഡിയയിൽ ഈ വിഷയത്തിൽ ആശങ്ക പ്രകടിപ്പിച്ചു. “ശുഭ്മാൻ ഗില്ലിന്റെയും സൂര്യകുമാർ യാദവിന്റെയും ഫോം? ഇന്ന് ബൗളിങ്ങിൽ 13 ഫുൾ ടോസുകൾ. ഇത് എങ്ങനെ മറികടക്കും? ഈ ചോദ്യങ്ങൾക്കെല്ലാം ഇന്ത്യൻ ടീം മറുപടി നൽകേണ്ടതുണ്ട്,” ഇർഫാൻ പഠാൻ X-ൽ കുറിച്ചു.
മത്സരത്തിൽ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ദക്ഷിണാഫ്രിക്ക ക്വിന്റൺ ഡി കോക്കിന്റെ വെടിക്കെട്ട് (46 പന്തിൽ 90) പ്രകടനത്തിന്റെ മികവിൽ 4 വിക്കറ്റ് നഷ്ടത്തിൽ 213 റൺസെടുത്തു. ബൗളിങ്ങിൽ അർഷദീപ് സിങ്ങും ജസ്പ്രീത് ബുംറയും ഉൾപ്പെടെയുള്ളവർ റൺസ് വാരിക്കോരി നൽകി. അവസാന 10 ഓവറിൽ മാത്രം 123 റൺസാണ് ഇന്ത്യ വഴങ്ങിയത്.
മറുപടി ബാറ്റിങ്ങിനിറങ്ങിയ ഇന്ത്യക്ക് തുടക്കത്തിൽ തന്നെ പിഴച്ചു. അഭിഷേക് ശർമ്മ (17), ശുഭ്മാൻ ഗിൽ (0), സൂര്യകുമാർ യാദവ് (5) എന്നിവർ പവർപ്ലേയിൽ തന്നെ പുറത്തായി. ലുങ്കി എൻഗിഡിയുടെയും മാർക്കോ ജാൻസെന്റെയും കൃത്യതയാർന്ന ബൗളിങ്ങിന് മുന്നിൽ ഇന്ത്യൻ ടോപ് ഓർഡർ തകർന്നു. ആക്സർ പട്ടേലിനെ മൂന്നാം നമ്പറിലേക്ക് സ്ഥാനക്കയറ്റം നൽകാനുള്ള ഗംഭീറിന്റെ തന്ത്രവും പാളി. ഏകനായി പൊരുതിയ തിലക് വർമ്മ (34 പന്തിൽ 62) മാത്രമാണ് ഇന്ത്യൻ ബാറ്റിങ് നിരയിൽ അൽപ്പമെങ്കിലും തിളങ്ങിയത്. 19.1 ഓവറിൽ 162 റൺസിന് ഇന്ത്യ ഓൾ ഔട്ടായതോടെ 51 റൺസിന്റെ വൻ തോൽവി ഏറ്റുവാങ്ങേണ്ടി വന്നു.
