തിരുവനന്തപുരം: 26 വയസ്സ് പൂർത്തിയാകുമ്പോൾ 25-ാം വർഷം ആഘോഷിച്ചാൽ എങ്ങനെയിരിക്കും? പ്രായം കൂടുന്തോറും പ്രായം കുറച്ച് പറയുന്ന ചിലരെപ്പോലെയാണ് കേരള ഇൻഫ്രാസ്ട്രക്ചർ ഇൻവെസ്റ്റ്മെന്റ് ഫണ്ട് ബോർഡ് അഥവാ കിഫ്ബിയും.
1999 നവംബർ 11-നായിരുന്നു കിഫ്ബിയുടെ ജനനം. സ്വാഭാവികമായും സിൽവർ ജൂബിലി (25 വർഷം) ആഘോഷിക്കേണ്ടത് 2024 നവംബറിലാണ്. എന്നാൽ, 2025-ന്റെ തുടക്കത്തിൽ സിൽവർ ജൂബിലി ആഘോഷിക്കാൻ നീക്കം ഉണ്ടായിരുന്നെങ്കിലും കിഫ്ബി സിഇഒ കെ.എം. എബ്രഹാമിനെതിരെ സിബിഐ അന്വേഷണം പ്രഖ്യാപിച്ചതോടെ അത് മാറ്റിവെച്ചു.
മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറിയും കിഫ്ബി സിഇഒയുമായ കെ.എം. എബ്രഹാമിനെതിരെ അനധികൃത സ്വത്ത് സമ്പാദന പരാതിയിൽ ഹൈക്കോടതി ഉത്തരവ് പ്രകാരം സിബിഐ കേസെടുത്തത് ആഘോഷങ്ങൾക്ക് തടസ്സമായി. മനുഷ്യാവകാശ പ്രവർത്തകൻ ജോമോൻ പുത്തൻപുരയ്ക്കൽ നൽകിയ ഹർജിയിലായിരുന്നു ഹൈക്കോടതിയുടെ നടപടി. പരാതിക്കാരന്റെ മൊഴി, വിജിലൻസ് റിപ്പോർട്ട്, മറ്റ് സുപ്രധാന രേഖകൾ എന്നിവയുടെ അടിസ്ഥാനത്തിൽ കേസ് രജിസ്റ്റർ ചെയ്യാൻ ജസ്റ്റിസ് കെ. ബാബുവാണ് സിബിഐക്ക് നിർദേശം നൽകിയത്.
എന്നാൽ, മുൻകൂർ പ്രോസിക്യൂഷൻ അനുമതിയില്ലാതെ കേസ് രജിസ്റ്റർ ചെയ്യാൻ കഴിയില്ലെന്ന കെ.എം. എബ്രഹാമിന്റെ വാദത്തെ തുടർന്ന് സുപ്രീം കോടതി കേസ് സ്റ്റേ ചെയ്തു.
ഈ നിയമക്കുരുക്കുകൾ കെട്ടടങ്ങിയതോടെ, കിഫ്ബി സിൽവർ ജൂബിലി ആഘോഷിക്കാനുള്ള ഫയൽ കെ.എം. എബ്രഹാം പൊടി തട്ടിയെടുത്തു. ധനമന്ത്രി കെ.എൻ. ബാലഗോപാൽ കിഫ്ബി സിൽവർ ജൂബിലി ആഘോഷ പരിപാടികൾ ഉടൻ പ്രഖ്യാപിക്കുമെന്നാണ് സൂചന. കോടികൾ മുടക്കിയുള്ള മറ്റൊരു ധൂർത്തിനായിരിക്കും കേരളം സാക്ഷ്യം വഹിക്കുക.
