കൊച്ചി: കോൺഗ്രസിലെ യുവനിരയുടെ ശ്രദ്ധേയ സാന്നിധ്യവും അങ്കമാലി എം.എൽ.എയുമായ റോജി എം. ജോൺ വിവാഹിതനാകുന്നു. ഏറെക്കാലത്തെ “ക്രോണിക് ബാച്ച്ലർ” എന്ന വിശേഷണം ഉപേക്ഷിച്ചാണ് റോജി ജീവിതത്തിൽ പുതിയൊരു ഘട്ടത്തിലേക്ക് പ്രവേശിക്കുന്നത്.
സ്വന്തം മണ്ഡലമായ അങ്കമാലിയിൽ നിന്നുതന്നെയാണ് എം.എൽ.എ വധുവിനെ കണ്ടെത്തിയത്. കാലടി മാണിക്കമംഗലം പുളിയേലിപ്പടി കോലഞ്ചേരി പൗലോസ് – ലിസി ദമ്പതികളുടെ മകളായ ലിപ്സിയാണ് വധു. ലിപ്സി ഒരു ഇന്റീരിയർ ഡിസൈനറാണ്. അങ്കമാലി ബസിലിക്ക പള്ളിയില് വച്ച് ഈ മാസം 29 നാണ് വിവാഹം നടക്കുക. മാണിക്യമംഗലം പള്ളിയില് വച്ച് നാളെ മനസമ്മതം നടക്കും.
അങ്കമാലി കല്ലുപാലം റോഡ് മുള്ളൻമടക്കൽ എം. വി. ജോണിന്റെയും എൽസമ്മയുടെയും മകനാണ് റോജി എം. ജോൺ. വിദ്യാർഥി രാഷ്ട്രീയത്തിലൂടെ ദേശീയ തലത്തിൽ ശ്രദ്ധനേടിയ റോജി, എൻ.എസ്.യു.ഐയുടെ ദേശീയ പ്രസിഡന്റായി പ്രവർത്തിച്ചിട്ടുണ്ട്. 2016 മുതൽ അങ്കമാലി മണ്ഡലത്തെയാണ് അദ്ദേഹം നിയമസഭയിൽ പ്രതിനിധീകരിക്കുന്നത്.
