തിരുവനന്തപുരം: സംസ്ഥാന സർക്കാർ ജീവനക്കാർക്കിടയിൽ ശമ്പള പരിഷ്കരണ ചർച്ചകൾ ചൂടുപിടിക്കുന്നു. ഇത്തവണത്തെ പരിഷ്കരണം ആനുകൂല്യങ്ങളുടെ പെരുമഴയാണോ അതോ നിയന്ത്രണങ്ങളുടെ തുടർച്ചയാണോ എന്ന ആശങ്കയിലാണ് ജീവനക്കാർ. പ്രധാനമായും ഉമ്മൻചാണ്ടി സർക്കാരിന്റെ കാലത്തെ പത്താം ശമ്പള പരിഷ്കരണമാണോ അതോ തോമസ് ഐസക്ക് നടപ്പിലാക്കിയ പതിനൊന്നാം ശമ്പള പരിഷ്കരണമാണോ മാതൃകയാവുക എന്നതാണ് പ്രധാന ചർച്ചാവിഷയം.
ഉമ്മൻചാണ്ടി മോഡൽ വരുമോ?
പത്താം ശമ്പള പരിഷ്കരണത്തിൽ 12% ഫിറ്റ്മെന്റും പരമാവധി 15% സർവീസ് വെയ്റ്റേജും നൽകിയിരുന്നു. കൂടാതെ 80% ക്ഷാമബത്തയും (DA) ലയിപ്പിച്ചാണ് അന്ന് ആനുകൂല്യങ്ങൾ പ്രഖ്യാപിച്ചത്. ജീവനക്കാർക്ക് വലിയ സാമ്പത്തിക നേട്ടം നൽകിയ ഒന്നായിരുന്നു ഇത്. ഇതേ മാതൃക ഇത്തവണയും ആവർത്തിക്കുമെന്ന പ്രതീക്ഷയിലാണ് ഒരു വിഭാഗം.
ഐസക്ക് ശൈലി തുടരുമോ?
എന്നാൽ, കോവിഡ് പ്രതിസന്ധിയുടെ പേരിൽ ആനുകൂല്യങ്ങൾ വെട്ടിക്കുറച്ച പതിനൊന്നാം ശമ്പള പരിഷ്കരണത്തിന്റെ ഓർമ്മകൾ ജീവനക്കാരെ ഭയപ്പെടുത്തുന്നുണ്ട്. അന്ന് വെറും 10% ഫിറ്റ്മെന്റ് മാത്രമാണ് നൽകിയത്. 28% ഡി.എ ലയിപ്പിച്ചെങ്കിലും, പതിറ്റാണ്ടുകളായി ലഭിച്ചിരുന്ന ‘സർവീസ് വെയ്റ്റേജ്’ പൂർണ്ണമായും ഒഴിവാക്കി.
സർവീസ് വെയ്റ്റേജ് തിരികെ ലഭിക്കുമോ?
സർവീസിലെ സീനിയോറിറ്റി പരിഗണിച്ച് നൽകുന്ന സർവീസ് വെയ്റ്റേജ് കോവിഡിന്റെ പേരിൽ ഒഴിവാക്കിയത് ജീവനക്കാർക്ക് വലിയ തിരിച്ചടിയായിരുന്നു. ഇത് ഇത്തവണ പുനഃസ്ഥാപിക്കുമോ അതോ എന്നെന്നേക്കുമായി ചരിത്രമാകുമോ എന്നതാണ് സംഘടനകൾ ഉറ്റുനോക്കുന്നത്.
