ന്യൂഡൽഹി: ഇന്ത്യയുടെ T20 ലോകകപ്പ് വിജയത്തിളപ്പിലും ഒരു വലിയ നഷ്ടത്തിന്റെ വേദനയിലാണ് താരം റിങ്കു സിംഗ്. ലോകകപ്പിനിടെ അന്തരിച്ച തന്റെ പിതാവ് ഖാൻചന്ദ് സിംഗിനെ ഓർത്ത് റിങ്കു സോഷ്യൽ മീഡിയയിൽ പങ്കുവെച്ച ഹൃദയസ്പർശിയായ കുറിപ്പ് ഇപ്പോൾ ആരാധകരുടെ കണ്ണുനനയിക്കുകയാണ്.
ലോകകപ്പിന്റെ ആവേശത്തിനിടയിലാണ് പിതാവിന്റെ വിയോഗം റിങ്കുവിനെ തേടിയെത്തിയത്. നാലാം ഘട്ട ലിവർ ക്യാൻസറിനെ തുടർന്ന് ചികിത്സയിലായിരുന്ന പിതാവ് ഫെബ്രുവരി അവസാനം അന്തരിക്കുകയായിരുന്നു. വലിയൊരു സ്വപ്നം ബാക്കിവെച്ചാണ് പിതാവ് യാത്രയായത്.
തന്റെ ഇൻസ്റ്റാഗ്രാം പോസ്റ്റിലൂടെ താരം കുറിച്ച വാക്കുകൾ ഇങ്ങനെ: “നിങ്ങളോട് സംസാരിക്കാതെ ഇത്രയും ദിവസങ്ങൾ ഞാൻ കടന്നുപോയിട്ടില്ല. നിങ്ങൾ ഇല്ലാത്ത ജീവിതം എങ്ങനെ മുന്നോട്ട് കൊണ്ടുപോകുമെന്ന് എനിക്കറിയില്ല. ജീവിതത്തിന്റെ ഓരോ ഘട്ടത്തിലും എനിക്ക് നിങ്ങളെ ആവശ്യമായിരുന്നു. ജോലി (Duty) ആണ് ഏറ്റവും വലുതെന്ന് നിങ്ങൾ പഠിപ്പിച്ചിട്ടുണ്ട്. അതുകൊണ്ട് തന്നെയാണ് ആ വേദനയിലും ഞാൻ കളിക്കളത്തിലിറങ്ങിയത്. നിങ്ങളുടെ സ്വപ്നം ഞാൻ സാധ്യമാക്കിയിരിക്കുന്നു. ഈ നേട്ടം ആഘോഷിക്കുമ്പോൾ കൂടെ നിങ്ങൾ ഉണ്ടായിരുന്നെങ്കിൽ എന്ന് വെറുതെ ആഗ്രഹിച്ചുപോകുന്നു. അച്ഛാ, ഞാൻ നിങ്ങളെ ഒരുപാട് മിസ്സ് ചെയ്യുന്നു.”
ലോകകപ്പ് ക്യാംപിൽ നിന്ന് പിതാവിന്റെ അസുഖത്തെ തുടർന്ന് നാട്ടിലേക്ക് മടങ്ങിയ റിങ്കു, സംസ്കാര ചടങ്ങുകൾക്ക് ശേഷം അതിവേഗം ടീമിലേക്ക് മടങ്ങിയെത്തിയത് വലിയ തോതിൽ പ്രശംസ പിടിച്ചുപറ്റിയിരുന്നു. പരിശീലകൻ ഗൗതം ഗംഭീറും ടീമംഗങ്ങളും റിങ്കുവിന് പൂർണ്ണ പിന്തുണയുമായി ഒപ്പമുണ്ടായിരുന്നു. സെമിഫൈനലിന് മുൻപ് ഗംഭീർ റിങ്കുവിനെ ആശ്വസിപ്പിച്ച വീഡിയോയും വലിയ ചർച്ചയായിരുന്നു.
സ്വന്തം പിതാവിന്റെ സ്വപ്നത്തിന് വേണ്ടി കളിക്കളത്തിൽ പൊരുതിയ റിങ്കുവിന്റെ ഈ വൈകാരികമായ കുറിപ്പ്, കായികതാരങ്ങളുടെ ജീവിതത്തിലെ കഠിനമായ വശങ്ങളിലേക്കാണ് വെളിച്ചം വീശുന്നത്.
