മുംബൈ: ഇന്ത്യൻ ക്രിക്കറ്റിലെ ഉറ്റ സുഹൃത്തുക്കളായ യുവരാജ് സിംഗ്, വീരേന്ദർ സെവാഗ്, മുഹമ്മദ് കൈഫ് എന്നിവർ വീണ്ടും ഒരുമിക്കുന്നു. നെറ്റ്ഫ്ലിക്സിലെ പ്രശസ്തമായ ‘ദി ഗ്രേറ്റ് ഇന്ത്യൻ കപിൽ ഷോ’യിലാണ് (The Great Indian Kapil Show) മൂവരും അതിഥികളായി എത്തുന്നത്. പരിപാടിയുടെ ടീസർ പുറത്തുവന്നതോടെ ആരാധകർക്കിടയിൽ കൈഫിന്റെ ഒരു തമാശ കലർന്ന വെളിപ്പെടുത്തലാണ് ഇപ്പോൾ വലിയ ചർച്ചയാകുന്നത്.
യുവരാജ് സിംഗിന്റെയും വീരേന്ദർ സെവാഗിന്റെയും സാമ്പത്തിക സ്ഥിതിയെക്കുറിച്ചായിരുന്നു കൈഫിന്റെ രസകരമായ നിരീക്ഷണം. “യുവരാജ് സിംഗിനെയും വീരേന്ദർ സെവാഗിനെയും അപേക്ഷിച്ച് ഞാൻ വളരെ പാവപ്പെട്ടവനാണ്. അവർ തോളൊന്ന് വെറുതെ ഒന്ന് കുടഞ്ഞാൽ തന്നെ 5-6 കോടി രൂപ അപ്പോൾ താഴെ വീഴും,” എന്ന് കൈഫ് തമാശരൂപേണ പറഞ്ഞു. ഈ പ്രസ്താവന കേട്ട് യുവരാജും സെവാഗും ഷോയിലെ കാണികളും പൊട്ടിച്ചിരിച്ചു.
എന്നാൽ ഇതിന് മറുപടിയുമായി യുവരാജ് സിംഗും രംഗത്തെത്തി. കൈഫിന്റെ കാലിലെ ഷൂവിലേക്ക് വിരൽ ചൂണ്ടിക്കൊണ്ട് “നീ ഏത് ബ്രാൻഡ് ഷൂവാണ് ധരിച്ചിരിക്കുന്നത്?” എന്ന് യുവരാജ് ചോദിച്ചു. ‘ഗുച്ചി’ (Gucci) എന്ന് കൈഫ് മറുപടി നൽകിയതോടെ, “എന്നിട്ടാണോ പാവമാണെന്ന് പറയുന്നത്” എന്ന് ചോദിച്ച് യുവരാജ് വീണ്ടും കൈഫിനെ കളിയാക്കി.
ഇന്ത്യൻ ക്രിക്കറ്റിലെ സുവർണ്ണ കാലഘട്ടത്തിൽ സഹതാരങ്ങളായിരുന്ന ഇവർ മൂവരും ഇന്നും അടുത്ത സൗഹൃദം പുലർത്തുന്നവരാണ്. 2002-ലെ നാറ്റ്വെസ്റ്റ് ട്രോഫി വിജയത്തിൽ യുവരാജ് സിംഗും മുഹമ്മദ് കൈഫും ചേർന്ന് കെട്ടിപ്പടുത്ത ഐതിഹാസിക പാർട്ണർഷിപ്പ് ഇന്നും ആരാധകരുടെ ഓർമ്മയിലുണ്ട്. ക്രിക്കറ്റിൽ നിന്ന് വിരമിച്ച ശേഷവും കമന്ററി ബോക്സിലും മറ്റും സജീവമായ ഇവർ ഒത്തുചേരുന്ന എപ്പിസോഡ് വലിയ ആവേശത്തോടെയാണ് ക്രിക്കറ്റ് പ്രേമികൾ കാത്തിരിക്കുന്നത്.
