തിരുവനന്തപുരം: സംസ്ഥാനത്തെ കേന്ദ്ര സർക്കാർ സ്ഥാപനങ്ങളിലും വ്യവസായ സ്ഥാപനങ്ങളിലുമുള്ള വോട്ടർമാരായ ജീവനക്കാർക്ക് വോട്ട് രേഖപ്പെടുത്തുന്നതിന് പ്രത്യേക സൗകര്യങ്ങൾ അനുവദിക്കും. സാധാരണ സേവന ആവശ്യകതകൾക്ക് തടസ്സമില്ലാത്ത രീതിയിൽ, വോട്ട് ചെയ്യുന്നതിന് ആവശ്യമായ ന്യായമായ സൗകര്യം ജീവനക്കാർക്ക് നൽകണമെന്ന് കേന്ദ്ര സർക്കാരിന്റെ പേഴ്സണൽ & ട്രെയിനിങ് (DoPT) വകുപ്പ് സംസ്ഥാന തിരഞ്ഞെടുപ്പ് കമ്മീഷനെ അറിയിച്ചു.
ഈ സൗകര്യം ഒരുക്കുന്നതിനായി ജീവനക്കാർക്ക് ഓഫീസിൽ വൈകി പ്രവേശിക്കുകയോ നേരത്തെ പോകാൻ അനുവദിക്കുകയോ അല്ലെങ്കിൽ വോട്ടെടുപ്പ് ദിവസം വോട്ടുചെയ്യുന്നതിന് പ്രത്യേക സമയം അനുവദിച്ചുകൊണ്ടോ സജ്ജീകരണങ്ങൾ ഒരുക്കാം.
വോട്ടർമാരായ കേന്ദ്ര സർക്കാർ ജീവനക്കാർക്ക് വോട്ട് രേഖപ്പെടുത്തുന്നതിന് ആവശ്യമായ സൗകര്യങ്ങൾ ഉറപ്പാക്കണമെന്ന് ആവശ്യപ്പെട്ട് സംസ്ഥാന തിരഞ്ഞെടുപ്പ് കമ്മീഷൻ കേന്ദ്രസർക്കാരിന് കത്ത് നൽകിയിരുന്നു. ഇതിനുള്ള മറുപടിയായാണ് കേന്ദ്ര പേഴ്സണൽ & ട്രെയിനിങ് വകുപ്പ് ഈ നിർദ്ദേശം നൽകിയിരിക്കുന്നത്. ജീവനക്കാരുടെ അവകാശം സംരക്ഷിക്കുന്നതിലും ഉയർന്ന പോളിംഗ് ശതമാനം ഉറപ്പാക്കുന്നതിലും ഈ നടപടി നിർണ്ണായകമാകും.
